پلوامہ (جموں و کشمیر) :ایک جانب جہاں انتظامیہ تعلیم کو فروغ دینے اور تعلیمی اداروں کا ڈھانچہ مستحکم بنائے جانے کے حوالے سے بلند بانگ دعوے کر رہی ہے وہیں جنوبی کشمیر کے ترال علاقے میں موجود گورنمنٹ ہائیر سیکنڈری اسکول ڈاڈسرہ میں جدید لیب کی عمارت تشنہ تکمیل ہونے سے سینکڑوں طلبہ کو مشکلات کا سامنا کرنا پڑ رہا ہے۔ ’’متعلقہ حکام کو بار بار اس ضمن میں آگاہ کیے جانے کے باوجود اس حوالے سے کچھ اقدامات نہ کیے جانے‘‘ سے طلباء میں ناراضگی پائی جا رہی ہے۔ طلباء کے مطابق لاکھوں روپے خرچ کرنے کے باوجود جدید لیب کو قابل استعمال نہ بنانے سے طلبہ کا مستقبل مخدوش بنتا جا رہا ہے اور ان کے لئے مختلف سائنسی تحقیق اور تجربات کے لیے لیبارٹری کا ہونا از حد ضروری ہے تاہم سرکاری دعووں کے برعکس اس حوالے سے کچھ نہیں کیا جا رہا ہے۔
گورنمنٹ ہائر سیکنڈری اسکول ڈاڈسرہ کے پرنسپل محمد امین نے میڈیا کے ساتھ گفتگو کرتے ہوئے بتایا کہ ’’یہ بڑی بدقسمتی کی بات ہے کہ زر کثیر خرچ کرنے کے باوجود لیب کو مکمل طور فعال نہیں بنایا جا سکا کیونکہ لیب میں بجلی فٹنگ نہ کیے جانے سے روشنی اور کئی تجربات کے لیے بجلی کی ضرورت پورے ادارے کے لیے از حد ضروری ہے لیکن بار ہا اس مسئلے کو لیکر متعلقہ تعمیراتی ایجنسی اور ایجوکیشن محکمہ کے ذمہ داروں کی نوٹس میں لایا گیا لیکن تاحال کوئی پیش رفت سامنے نہیں آ رہی ہے۔‘‘ انہوں نے اعلی حکام سے اس ضمن میں فوری مداخلت کی اپیل کی ہے۔