سویڈن کی مرکزی جامع مسجد کے سامنے عید الاضحیٰ کے دن سالوان مومیکا کے ذریعہ قرآن کریم کے نسخے کو نذرِ آتش کئے جانے کے خلاف دنیا بھر کے مسلمانوں میں غم و غصہ پھوٹ پڑا ہے، اسی لئے آج جمعہ کو بموقع شہادت حضرت عثمان غنی رضی اللّٰہ عنہ پر رضا اکیڈمی نے سویڈن میں نسخہ قرآن سوزی پر یوم قرآن منانے کی اپیل کی اور ملک سمیت دنیا بھر کے مسلمانوں نے مساجد و مدارس جامعات و مکاتب خانقاہ ودرسگاہ یہاں تک کہ گھروں میں بڑے پیمانے پر تلاوتِ قرآن کریم کا اہتمام کیا گیا۔
عالمی یوم قرآن کے کامیاب انعقاد پر بیان دیتے ہوئے قائد ملت اسیر مفتی اعظم الحاج محمد سعید نوری نے کہا کہ جس طرح سے سویڈن حکومت کی اجازت سے سلوان مومیکا نے قرآن پاک کے نسخے کو نذرِ آتش کرکے اپنی بدبختی کا ثبوت دیا ہے، اس سے حکومت سویڈن نے اپنی اسلام و مسلم دشمنی کو ظاہر کردیا ہے۔ جس پر در عمل پیش کرتے ہوئے دنیا بھر کے مسلمانوں نے رضا اکیڈمی کی اپیل پر خطاب جمعہ میں آئمہ مساجد نے بھرپور طریقے سے سویڈن کی مذمت کرتے ہوئے عظمت قرآن پر خطاب کیا۔
نوری نے مزید کہا کہ کیا یورپی ممالک آزادی اظہار رائے کا مطلب توہین رسالت و قرآن کریم کی بے حرمتی سمجھتے ہیں، اگر ان کے نزدیک آزادی اظہار رائے کا مطلب یہی ہے تو میں ایسی اظہار رائے کی آزادی پر تھوک دیتا ہوں جس میں مقدس کتاب کی بے حرمتی ہو۔ نوری نے کہا کہ ایک کروڑ سے زائد آبادی والا ملک سویڈن مسلسل اہانت رسول و توہین قرآن کا مرتکب ہورہا ہے افسوس 57مسلم مملکت کے سربراہان صرف ہم خیال ہوکر سویڈش کی پروڈکٹ کا بائیکاٹ کردیں تو اس کے ہوش ٹھکانے آجائیں۔ مگر وہ صرف زبانی خرچ کے علاوہ کچھ نہیں کرتے وہیں
اقوام متحدہ دنیا کی سب سے مجبور تنظیم بن رہ گئ ہے، جس سے کسی طرح کی امید کرنا فضول ہے۔
مسلم سربراہان کو چاہیے کہ وہ سویڈن کے خلاف عالمی کورٹ میں مقدمہ دائر کریں ،مزید سویڈن نیٹو کی رکنیت حاصل کرنا چاہتا ہے اسے ہرگز ہرگز اس کی رکنیت نہ دی جائے۔ آخر میں نوری نے امت مسلمہ کو پیغام دیتے ہوئے کہا کہ مسلمان کثرت سے قرآن کریم کی تلاوت کا اہتمام کریں خواتین اسلام کم از کم ایک رکوع کی تلاوت خود کریں اور اپنے بچوں کی تربیت بھی قرآن کریم کی تلاوت کے بہاروں میں کریں ان شآء اللّٰہ پورا گھر،خاندان، معاشرہ، اس طرح سے قرآن کریم سے اپنا رشتہ مضبوط کرے گا۔