بچہ چوری کی افواہ پر ایک شخص کا پیٹ پیٹ کرقتل

مدھیہ پردیش کے دھار میں بچہ چوری کے افواہ پر گاؤں والوں نے کسانوں پر وحشیانہ حملہ کر دیا، جس میں ایک کسان کی موقع پر ہی موت واقع ہو گئی۔

ریاست مدھیہ پردیش میں دھار ضلع کے منوّر میں بچہ چوری کی افواہ پر گاؤں والوں نے کسانوں پر حملہ کر دیا جس میں ایک شخص کی موقع پر ہی موت ہوگئی جبکہ دیگر پانچ شدید طور پر زخمی ہوئے ہیں۔

اطلاع کے مطابق دھار ضلع کے کھڑکیا دیہائی علاقے کے کسانوں نے اپنے کھیتوں میں فصل کٹائی کے لئے مزدوروں کو پیشگی رقم دی تھی، جس کے پیش نظر آج کسان اپنے کھیتوں میں فصل کٹائی کے لیے مزدوروں کا انتظار کرتے رہے لیکن مزدور نہیں پہنچے۔

کھیتوں میں فصل کٹائی کے لیے مزدوروں کے نہیں آنے پر کسان مزدوروں سے اپنی ایڈوانس رقم لینے اجین سے کھڑکیا گاؤں پہنچے تھے، تبھی گاؤں میں کسی نے بچہ چور کے آنے کی افواہ پھیلا دی۔

جس کے بعد گاؤں والوں نے کسانوں پر لاٹھی ڈنڈے اور پتھروں سے وحشیانہ حملہ کر دیا۔ جس میں ایک شخص کی موقع پر موت واقع ہو گئی اور پانچ کسان شدید طور پر زخمی ہو گئے۔

موقع واردات پر پہنچی پولیس نے معاملے کی ایف آئی آر درج کرکے تحقیقات شروع کر دی ہے۔