کولگام میں پل کو شدید نقصان، عوام نے جلد مرمت کا مطالبہ کیا

ضلع کولگام میں دریائے ماو پر قائم پل پر سے ایک ٹرالر گزرنے کے سبب پل کو شدید نقصان پہنچا جس کے سبب شوپیان - کولگام رابطہ سڑک پر ٹریفک کی نقل و حرکت متاثر ہو گئی ہے۔

جنوبی کشمیر کے ضلع کولگام کے چولگام علاقے میں دریائے ماو پر قائم پُل پر سے دوران شب ایک ٹرالر کے گزرنے پل کو شدید نقصان پہنچا۔

پل کو ہوئے نقصان کے باعث ضلع شوپیان کو کولگام سے ملانے والی اہم رابطہ سڑک پر ٹریفک کی نقل و حرکت متاثر ہو گئی ہے۔

مقامی باشندوں نے پل کی جلد سے جلد تعمیر کیے جانے کا مطالبہ کیا ہے۔

محکمہ تعمیرات عامہ کے ایگزیکٹیو انجینئر نے بتایا کہ سرینگر سے انجینئروں کی ایک ٹیم نے پل کا جائزہ لیا۔ انہوں نے بتایا کہ پل کی مرمت کا کام جلد شروع کرکے اسے چند دنوں میں ہی آمد و رفت کے قابل بنایا جائے گا۔