سرکاری دفتر میں بجلی گلُ، موبائل کی روشنی میں کام جاری

کرناٹک کے ضلع یادگیر میں واقع لینڈ سروے آفس گزشتہ کئی روز سے گھُپ اندھیرے میں ڈوبا ہوا ہے اور اسی تاریکی میں وہاں کے کام کاج چل رہے ہیں۔ بجلی گُل ہونے کی وجہ سے موبائیل کے ٹارچ کے ذریعے کام چل رہا ہے۔

سبھاش لینڈ سروس آفیسر یادگیر نے بتایا کہ آفس منٹیننس کے اخراجات نہ آنے کی وجہ سے گزشتہ آٹھ ماہ سے بجلی کا بل ادا نہیں کیا گیا ہے۔

اس بات کی اطلاع ضلع انتظامیہ اور محکمہ بجلی کو دی جا چکی ہے، اس کے باوجود محکمہ بجلی کے ذمہ داران نے دفتر کا بجلی کا کنکشن کاٹ دیا ہے، جس کی وجہ سے بجلی نہیں ہے اور دفتری کام میں بے حد رکاوٹ پیش آ رہی ہے۔

اس موقع پر کسان رکشنا تنظیم کے صدر سنگنا گوڈا نے کہا کہ یہ دفتر کسانوں سے تعلق رکھتا ہے یہاں پر ہر روز مختلف دیہاتوں سے کئی کسان آتے ہیں، مگر یہاں پر مسلسل بجلی نہ ہونے کی وجہ سے کام وقت پر نہیں ہو رہا ہے۔ انہوں نے کہا کہ کسانوں کو اس طرح پریشان کرنے سے بہتر تھا کہ دفتر کو بند کر دیا ہوتا۔

انہوں نے حکومت سے اپیل کرتے ہوئے کہا کہ اس مسئلہ کو جلد سے جلد حل کیا جائے۔ انہوں نے مزید کہا کے یہ کتنی افسوس کی بات ہے کہ ایک سرکاری دفتر میں بجلی نہیں ہے اور دفتر کے ذمہ داران اندھیرے میں کام کر رہے ہیں۔