نیشنل پینتھرز پارٹی نے ڈائریکٹوریٹ آف ہیلتھ سروسز کے دفتر کے باہر احتجاج کیا۔ انہوں نے یہ احتجاج ادھمپور کے رام نگر علاقے میں نامعلوم بیماری کی وجہ سے دس بچوں کی اموات کے خلاف کیا۔
واضح رہے کہ ضلع ادھمپور میں چند روز قبل 10 بچے نامعلوم مرض کی وجہ سے ہلاک ہو گئے تھے جبکہ چھ دیگر بچے اب بھی اسپتال میں زیر علاج ہیں۔
پارٹی کے چیئرمین ہرش دیو سنگھ نے ای ٹی وی بھارت کے ساتھ بات کرتے ہوئے کہا کہ 'جس طرح سے ادھمپور میں 10 بچوں کی موت واقع ہوئی ہے۔ اس کے ذمہ دار جموں و کشمیر انتظامیہ خاص کر محکمہ صحت کے ملازمین ہیں۔'
انہوں نے کہا کہ 'آج تک ڈاکٹر کو یہ بھی معلوم نہیں کہ ادھمپور میں دس بچوں کی موت کس طرح ہوئی ہے اور ان کی موت کی وجوہات کیا ہیں۔'
واضح رہے کہ جموں کے ادھمپور ضلع کے رام نگر بلاک میں رات کو بچوں کو اچانک بخار اور الٹی ہوئی جس کے بعد ان کی موت ہو گئی۔
