طلاق ثلاثہ بل کی منظوری،بی جے پی نے جشن منایا

ریاست جموں و کشمیر کے خطہ جموں میں بی جے پی مہیلا مورچہ کے کارکنان نے طلاق ثلاثہ بل راجیہ سبھا میں پاس ہونے پر جموں کے بی جے پی دفتر میں جشن منایا۔

ریاستی بی جے پی مہیلا مورچہ کی صدر اور سابق وزیر پریا سیٹی نے اس بل پر اپنی خوشی کا اظہار کرتے ہوئے ای ٹی وی بھارت کو بتایا کہ 'اس بل کو منظور کرنے کی بے حد ضرورت تھی، خواتین کو برابر درجے کا حق ملے گا۔'

انہوں نے بل کو منظور کرنے پر وزیراعظم نریندر مودی کا شکریہ بھی ادا کیا۔

واضح رہے کہ 30 جولائی 2019 کو ایوان بالا یعنی راجیہ سبھا میں بحث و مباحثے کے بعد طلاق ثلاثہ بل کو منظور کر دیا گیا۔

ایوان زیریں یعنی لوک سبھا میں اسے بھاری اکثریت سے پہلے ہی منظور کر دیا گیا ہے۔

صدر رام ناتھ کووند کے دستخط کے بعد اب یہ باضابطہ قانون بن گیا ہے۔

راجیہ سبھا میں بل کی حمایت میں 99 ووٹ پڑے جبکہ مخالفت میں 84 ووٹ ڈالے گئے۔

این ڈی اے کی حلیف جماعت جنتا دل یونائٹیڈ اور اے آئی اے ڈی ایم کے نے بل کی مخالفت کی لیکن ووٹنگ کے وقت اس کے اراکین ایوان سے غیر حاضر رہے۔