ضلع انتظامیہ گاندربل نے پبلک آوٹ ریچ پروگرام کے تحت گورنمنٹ ہائر سیکنڈری اسکول کرہامہ، واکورہ میں میگا بلاک دیوس کا انعقاد کیا۔ جس کا مقصد لوگوں کے مسائل کو حل کرنا تھا۔ کیمپ کی صدارت ایڈیشنل ڈسٹرکٹ ڈیولپمنٹ کمشنر (اے ڈی ڈی سی) گاندربل، مشتاق احمد سمنانی کے ساتھ بی ڈی سی چیئرپرسن واکورہ نے کی۔ کیمپ میں پی آر آئی ممبران اور بلاک واکورہ کے سرکردہ شہریوں نے شرکت کی جنہوں نے اپنے علاقوں سے درپیش مسائل اور مطالبات بشمول واٹر سپلائی اسکیموں کی بروقت تکمیل، پی ایچ سی کرہامہ میں عملے کی کمی کرمہ میں پنچایت کی عمارت، کھیل کے میدان، لنک روڈز کی تعمیر و تجدید پر روشنی ڈالی۔
پی ایچ سی بٹوینہ میں ترقی کے لیے سڑکوں کی کشادگی، واٹر سپلائی اسکیموں میں اضافہ، آپاشی کنال کی صفائی، گز ہامہ پل کی تکمیل، ہینڈ لوم ٹریننگ سنٹر، قبرستان کی بھرائی، کرہامہ میں ویٹرنری سنٹر اور عوامی اہمیت کے دیگر امور شامل ہیں۔ اے ڈی ڈی سی نے مقامی لوگوں کی جانب سے اٹھائے گئے تمام مسائل سنے اور انہیں یقین دلایا کہ ان کے مطالبات کو متعلقہ محکموں کے ساتھ مشورہ کر کے حل کیا جائے گا۔ انہوں نے مقامی لوگوں کے مسائل و مشکلات کے بروقت ازالہ کو یقینی بنانے کے لیے افسران کو ضروری ہدایات دی۔