'بہار میں اسمبلی انتخابات مضبوطی سے لڑیں گے'

ریاست بہار ضلع ارریہ میں گذشتہ دنوں میں ضمنی انتخابات نتائج جس طرح سے آئے ہیں اس سے ریاستی حکومت کو سمجھ لینا چاہیے عوام کا موڈ کیا ہے؟

کانگریس کے سینیئر رہنما و بہار کانگریس کے انچارج شکتی سنگھ گوئل نے آج سرکٹ ہاؤس میں صحافیوں سے گفتگو کرتے ہوئے کہا کہ 'مرکزی حکومت و ریاستی حکومت نے مل کر بہار کی عوام کو جس طرح سے بیوقوف بنایا ہے اس کا بدلہ عوام 2020 کے اسمبلی انتخاب میں ووٹ کے ذریعے دے گی'۔

شکتی سنگھ گوئل یہاں ارریہ کے رکن اسمبلی عابد الرحمن کی صاحبزادی کی شادی میں شرکت کرنے آئے ہوئے تھے، اس سے قبل کانگریس ضلع کے درجنوں کارکنان نے سرکٹ ہاؤس میں شکتی سنگھ گوئل کا پھول مالاؤں سے استقبال کیا۔

چند لمحے بعد یہاں رک کر کارکنان سے موجودہ سیاسی حالات پر تبصرہ کیا اور آئندہ اسمبلی انتخاب کے لئے پنچایت و بلاک سطح پر عوام کو بیدار کرنے کی ہدایت دی۔
انہوں نے کہا کہ نتیش حکومت پوری طرح سے بی جے پی کے زد میں ہے، کل تک عظیم اتحاد میں وہ گھٹن محسوس کر رہے تھے مگر آج خود ہی بی جے پی کے پنجہ میں جکڑے ہوئے ہیں۔

گوئل نے کہا کہ بہار میں جس طرح کرائم، لوٹ، مار، عصمت دری، بےروزگاری کے واقعات بڑھ رہے ہیں وہ افسوسناک ہے۔
ایک سوال کے جواب میں شکتی سنگھ گوئل نے کہا کہ بہار میں عظیم اتحاد بالکل مضبوط ہے، یہ صحیح بات ہے کہ ضمنی انتخاب میں چند وجوہات کے بناء پر ہم ایک ساتھ نہیں تھے مگر اس کا اثر ریاستی انتخاب پر نہیں پڑے گا۔
کشن گنج میں اے ایم آئی ایم کی جیت پر شکتی سنگھ گوئل نے کہا کہ وہاں کی عوام نے جسے منتخب کیا ہے اس کے لئے مبارک باد ہے۔
اس موقع پر ریاستی صدر مدن موہن جھا کے علاوہ پارٹی کے دیگر رہنما بھی موجود رہے۔