سوپور میں 21 سالہ نوجوان لاپتہ

شمالی کشمیر کے بارہمولہ ضلع میں سوپور قصبے سے تعلق رکھنے والے ایک نوجوان کے گمشدہ ہونے کی رپورٹ درج کیے جانے کے بعد پولیس نے لاپتہ نوجوان کی تلاش شروع کر دی ہے۔

شمالی کشمیر میں ضلع بارہمولہ کے سوپور قصبہ سے تعلق رکھنے والا 21 سالہ نوجوان دو دنوں سے لاپتہ ہے۔ اس ضمن میں پولیس نے ایک بیان جاری کرتے ہوئے کہا ہے کہ قصبے کے خوجہ گلگت علاقے سے تعلق رکھنے والا 21 سالہ عامر سراج بٹ 24 جون کو اپنے ماموں کے گھر آدی پورہ جانے کے بعد واپس نہیں لوٹا۔

عامر کے والد سراج الدین بٹ نے اپنے رشتہ داروں کو عامر کے حوالے سے معلومات حاصل کیں تاہم عامر کا کہیں پتہ نہیں چلا جس کے بعد پورے خاندان میں تشویش کی لہر دوڑ گئی۔

بسیار تلاش کے باوجود عامر کا کوئی سراغ نہ مل سکا، جس کے بعد عامر کے والد نے پولیس اسٹیشن سوپور میں جمعرات کو گمشدگی کی ایک رپورٹ درج کی۔

اس حوالے سے سوپور پولیس نے مقامی باشندوں سے بھی عامر کو ڈھونڈنے میں مدد طلب کی ہے، سوپور پولیس نے فون نمبر جاری کرتے ہوئے کہا: ’’اگر عامر کے بارے میں کسی کو بھی کوئی جانکاری ہو تو وہ پولیس کو فوری طور مطلع کرے۔‘‘