نئی دہلی: بھارتی کرکٹ ٹیم کے مڈل آرڈر بلے باز سوریہ کمار یادیو ان دنوں خراب فارم کی وجہ سے کرکٹ شائقین کے نشانے پر ہیں۔ ونڈے میں توقع کے مطابق کارکردگی نہ دکھانے کی وجہ سے کرکٹ شائقین سلیکٹرز پر سوالات اٹھا رہے ہیں۔ 32 سالہ سوریہ کمار یادیو کو آسٹریلیا کے خلاف ونڈے سیریز میں شریاس ائیر کی جگہ موقع ملا، لیکن سوریہ مسلسل ون ڈے میچوں میں فلاپ ثابت ہوئے۔ وہ پہلی گیند پر وکٹ گنوا نے والے بلے باز بھی بنے۔ اب سوشل میڈیا پر لوگ سوریہ کمار یادو کے بجائے سنجو سیمسن کو ٹیم میں موقع دینے کی بات کر رہے ہیں۔ اسی درمیان کانگریس رہنما ششی تھرور نے سوریا کو ٹیم میں بار بار موقع دیئے جانے پر سوال اٹھائے ہیں۔ اس کے ساتھ انہوں نے دائیں ہاتھ کے بلے باز سنجو سیمسن کی حمایت کی ہے۔
ششی تھرور نے ٹوئٹر پر لکھا کہ سنجو سیمسن ٹیم میں کیوں نہیں تھے؟ تھرور نے لکھا کہ 'اب جب بے چارے سوریہ کمار یادو نے مسلسل تین گولڈن ڈک کے ساتھ ناقابل یقین عالمی ریکارڈ بنایا ہے، تو کیا یہ پوچھنا ناانصافی ہے کہ چھٹے نمبر پر بلے بازی کرنے کے باوجود ون ڈے میں 66 کی اوسط رکھنے والے سنجو سیمسن ٹیم میں کیوں نہیں تھے؟ اسے کیا کرنے کی ضرورت ہے؟'