جنوبی افریقہ کے بینونی میں کھیلے گیے کوارٹر فائنل میں پاکستان نے افغانستان کو جمعہ کو چھ وکٹوں سے شکست دے کر انڈر -19 ورلڈ کپ کرکٹ ٹورنامنٹ کے سیمی فائنل میں جگہ بنا لی جہاں اس کا مقابلہ روایتی حریف بھارت سے ہوگا۔
کوارٹر فائنل میں افغانستان کی ٹیم 49.1 اوور میں 189 رن پر سمٹ گئی۔
کپتان فرحان زخیل نے 55 گیندوں میں 40 رنز بنائے۔رحمان اللہ نے 29، عابد محمدی نے 28 اور عبدالرحمان نے 30 رن بنائے۔
پاکستان کی جانب سے محمد عامر خان نے 58 رن دے کر تین وکٹ حاصل کئے۔
پاکستان نے اوپنر محمد هریرہ کے 76 گیندوں میں آٹھ چوکوں اور ایک چھکے کی مدد سے بنے 64 رنز کی بدولت 41.1 اوورز میں چار وکٹ پر 190 رن بنا کر جیت حاصل کر لی۔
حیدر علی نے 28، کپتان روحیل نذیر نے 22، قاسم اکرم نے ناٹ آؤٹ 25 اور محمد حارث نے ناٹ آؤٹ 29 رنز بنا کر ٹیم کو آسان جیت دلا دی۔هریرہ کو پلیئر آف دی میچ کا ایوارڈ ملا۔
پاکستان کے چار فروری کو ہونے والے سیمی فائنل میں گزشتہ چمپئن بھارت کے ساتھ پوچیفسٹروم میں مقابلہ ہوگا۔
بھارت نے اپنے کوارٹر فائنل مقابلے میں آسٹریلیا کو 74 رنز سے شکست دی تھی۔