ڈھاکہ: بنگلہ دیش کی 12ویں پارلیمنٹ کے انتخابات میں ووٹنگ اتوار کو مقامی وقت کے مطابق شام 4 بجے ختم ہو گئی۔ مقامی میڈیا ڈھاکہ ٹریبیون نے یہ اطلاع دی۔ الیکشن کمیشن کے مطابق ووٹنگ مقامی وقت کے مطابق صبح آٹھ بجے شروع ہوئی پارلیمنٹ کی 299 نشستوں کے لیے ملک بھر میں 42 ہزار سے زائد پولنگ اسٹیشنز پر انتخابات ہوئے پولنگ ختم ہونے کے بعد ووٹوں کی گنتی شروع ہو گئی ہے۔
بنگلہ دیش میں اتوار کو ہونے والے انتخابات کے دوران متعدد پولنگ اسٹیشنوں پر کچھ جھڑپوں اور بنگلہ دیش نیشنلسٹ پارٹی (بی این پی) سمیت اپوزیشن جماعتوں کی ہڑتال اور بائیکاٹ کی کالوں کے درمیان ووٹنگ کم رہی۔ چیف الیکشن کمشنر نے کہا کہ ابتدائی اندازوں کے مطابق تقریباً 40 فیصد ووٹ ڈالے گئے تاہم حتمی گنتی کے بعد یہ تعداد تبدیل ہو سکتی ہے۔ انہوں نے بتایا کہ سہ پہر 3 بجے تک 27.15 فیصد ووٹنگ ریکارڈ کی گئی۔