کانگو میں کشتی ڈوبنے سے 60 افراد ہلاک، سیکڑوں لاپتہ

افریقی ملک کانگو کے مائی دومبے صوبے میں ایک مسافر بردار کشتی ڈوبنے سے 60 افراد ہلاک جبکہ سیکڑوں لاپتہ بتائے جارہے ہیں۔

وسطی افریقی ملک کانگو کے مائی دومبے صوبے کے گاؤں لونگولا ایکوٹی میں ایک مسافر بردار کشتی ڈوبنے سے 60 افراد ہلاک ہوگئے ہیں اور سیکڑوں لاپتہ بتائے جارہے ہیں۔

تقریبا 700 افراد کو لیکر جانے والی مسافر بردار کشتی رات کے وقت حادثے کا شکار ہوکر ڈوب گئی جس کے بعد اب تک 60 ہلاکتوں کی تصدیق ہوچکی ہے۔

کانگو میں کشتی ڈوبنے سے 60 افراد ہلاک، سیکڑوں لاپتہ

حکام کے مطابق، کشتی کے حادثے میں 300 افراد کی جان بچ گئی ہے جبکہ دیگر افراد کے بارے میں حتمی معلومات حاصل نہیں ہوسکیں ہیں۔

یہ جہاز دارالحکومت کنشاسا سے روانہ ہوا تھا اور صوبہ استوا کی طرف جارہا تھا۔

خیال رہے کہ گذشتہ ماہ کیو جھیل میں مسافر کشتی ڈوبنے سے کم از کم تین لوگ ہلاک ہوئے تھے، جن میں دو بچے اور ایک خاتون شامل تھیں۔

گذشتہ برس مئی سنہ 2020 میں کیو جھیل میں ایک تفریحی کشتی ڈوب گئی تھی جس میں ایک آٹھ سالہ بچی سمیت 10 افراد کی موت ہوگئی تھی۔

جولائی سنہ 2010 میں مغربی صوبہ بینڈنڈو میں کشتی کے ٹکرانے کے بعد 135 سے زیادہ افراد ہلاک ہوگئے تھے۔