دارالحکومت دہلی میں پھلوں اور سبزیوں کی سب سے بڑی ہول سیل مارکیٹ آزاد پور منڈی میں کورونا سے بے خوف لوگ سماجی فاصلے کے اصولوں کی خلاف ورزی کر رہے ہیں۔
وہیں گاڑیوں کی بے ترتیب داخلے کی وجہ سے آمد و رفت بھی کافی متاثر ہوتی ہے جس کی وجہ سے ٹریفک جیسی صورت حال پیدا ہوجاتی ہے۔
منڈی کے منتخب ممبر انل ملہوترہ کا کہنا ہے کہ انتظامیہ کی تساہلی کی وجہ سے لوگوں کا ہجوم دکھائی دیتا ہے، انھوں نے اے پی ایم سی (ایگریکلچر پروڈیوس مارکیٹ کمیٹی )کے چیئرمین پر ذمہ داری عائد کرتے ہوئے کہا کہ انہوں نے دانشتہ طور پر آنکھیں بند کر رکھی ہیں، جس سے یہ مسائل پیدا ہو رہے ہیں، داخلی اور خارجی راستوں پر گارڈ بیٹھے ہوئے ہیں، جو غلط طریقے سے گاڑیوں کی انٹری کرا رہے ہیں جس سے گیٹ کے باہر گاڑیوں کی طویل قطاریں لگ جاتیں ہیں۔
انھوں نے مزید کہا کہ اندر جانے اور آنے والے عجلت میں غلط راستے سے گاڑیاں لے جاتے ہیں اور گاڑیوں کی پارکنگ بھی غلط طریقے سے ہو رہی ہے، جس سے آمد و رفت میں مزید دشواری ہوتی ہے، اس کے بندوبست کا کوئی معقول انتظام بھی نہیں ہے۔