علیگڑھ میں سی اے اے کے خلاف خواتین کا احتجاج جاری

سی اے اے، این آر سی اور این پی آر کے خلاف خواتین کے احتجاج میں جہاں شاہین باغ کا نام سرفہرست ہے وہیں علیگڑھ کی خواتین نے بھی شاہین باغ کی طرز پر احتجاج شروع کر دیا ہے۔

ریاست اترپردیس کے ضلع علی گڑھ کے علاقے شاہ جمال میں شاہین باغ کی طرز پر علیگڑھ کی خواتین نے بھی سی اے اے، این آر سی اور این پی آر کے خلاف احتجاجی مظاہرہ شروع کردیا ہے۔

گزشتہ روز سے عید گاہ کے سامنے شاہ جمال اور اطراف کے علاقوں کی خواتین کافی تعداد میں احتجاجی مظاہرہ کر رہی ہیں۔ پرامن طریقے سے احتجاج کر رہی خواتین کا پولیس کی کارروائی پر سنگین الزام ہے کہ انہوں نے خواتین پر احتجاج ختم کرنے کا دباؤ بنایا۔

احتجاج کر رہی خواتین کا کہنا ہے کہ جب تک حکومت سی اے اے، این آر سی اور این پی آر کو واپس نہیں لیتی ہم لوگ بھی اسی طرح اپنا احتجاجی مظاہرہ کرتے رہیں گے۔

احتجاج میں شامل ایک خاتون نے کہا ہم نے گزشتہ روز سے ہی یہاں پر احتجاج کر رہے ہیں، علی گڑھ پولیس ہمارے اوپر دباؤ بناتی ہے ہم کو یہاں سے ہٹانے کی کوشش کرتی ہے پہلے بھی یونیورسٹی کی ایک لڑکی کو حراست میں لے لیا تھا اور ہم سے کہا گیا کہ یہ احتجاج ختم کروگے تبھی ہم چھوڑیں گے۔