دارالحکومت دہلی کے پرانی دہلی میں ایک سیلون جو زلفوں کی تراش و خراش کے لیے مقبول تھا لیکن کورونا وائرس اور لاک ڈاؤن کی وجہ سے گذشتہ دو ماہ سے بند پڑا ہے۔
رمضان المبارک کا مہینہ سیلونز مالکان کے لیے کافی اہم مانا جاتا ہے، خصوصاً رمضان المبارک کے آخری عشرے میں سیلونوں کے باہر لمبی لمبی قطاریں لگی رہتی تھیں، تاہم رواں برس معاملہ قدرے مختلف ہے۔
حکومت کی جانب سے جاری کردہ ہدایات کے مطابق سیلون کھولنے پر پابندی عائد ہے جس کی وجہ سے ان میں کام کرنے والے حجاموں اور ہیئر ڈریسرز کے لیے معاش کی پریشانی کھڑی ہو گئی ہے۔
گذشتہ 40 برس سے ہی اس پیشے سے جڑے محمد فرقان سلمانی نے ای ٹی وی بھارت سے بات کرتے ہوئے بتایا کہ انہوں نے ایسی صورتحال پہلے کبھی نہیں دیکھی۔ 60 روز ہونے کو ہیں اور ہم نے ایک دن بھی کام نہیں کیا۔' محمد عرفان بتاتے ہیں کہ رمضان المبارک کے دوران کام اتنا زیادہ ہوا کرتا تھا کہ رات میں دو بج جاتے تھے لیکن اب 60 روز سے ہم نے کسی بھی گاہک کے بالوں پر ہاتھ نہیں پھیری۔
وہیں محمد فیصل نے بتایا کہ ہمارے سیلون میں اتنی بھیڑ ہوتی تھی کہ ہمیں رمضان کے ماہ میں ٹوکن جاری کرنا پڑتا تھا۔ لیکن اس برس تو پورا رمضان سوکھا ہی گزر گیا ہے'۔
