نئی دہلی: دارالحکومت دہلی کے اندرا گاندھی بین الاقوامی ہوائی اڈے پر ایک ہوائی مسافر کو فون پر دھمکی آمیز آڈیو کال موصول ہونے کے بعد سنسنی پھیل گئی۔ ریکارڈ شدہ کال میں خالصتانی حامی دہلی کے پرگتی میدان پر قبضہ کرنے کی بات کر رہا ہے۔ کال میں کہا جا رہا ہے کہ بھارت کے قومی پرچم کو نیچے اتار کر وہاں خالصتان کے جھنڈے لگائے جائیں گے۔ مسافر نے ہوائی اڈے کی پولیس کو بتایا کہ خالصتانی حامی وزیر اعظم نریندر مودی اور وزیر داخلہ امیت شاہ کے خلاف بھی قابل اعتراض بیانات دے رہے ہیں۔
انہوں نے امرت پال کا بھی ذکر کیا، جس کے بعد دہلی پولیس مستعد ہوگئی ہے۔ اس معاملے میں اندرا گاندھی انٹرنیشنل ایئرپورٹ پولیس اسٹیشن میں آئی پی سی کی دفعہ 153/153A اور 505 کے تحت ایف آئی آر درج کی گئی ہے۔ اس کی تصدیق کرتے ہوئے ڈی سی پی ایئرپورٹ نے کہا کہ ہوائی مسافر کو پہلے سے ریکارڈ شدہ آڈیو کال موصول ہوئی ہے۔ بتایا جا رہا ہے کہ اس معاملے کی تحقیقات اسپیشل سیل کو سونپ دی گئی ہے۔