ایئرو انڈیا کی تقریب ہوا بازی صنعت کے لیے نہایت اہمیت کا حامل ہے۔آج سے بنگلورو کے ایلہنکا ائیر فورس اسٹیشن پر اس کی شروعات ہوگی۔اس نمائش میں ناظرین کی خاصا توجہ 'سوریہ کرن ' طیارہ اور 'سارنگ' ہیلی کاپڑ پر مبذول ہوگی۔ساؤتھ ڈکوٹا میں ایلورتھ ائیر فورس اڈے کی 28 ویں بامب ونگ کا بی 1 لانسر' فلائی بائے' پیش کرے گا۔
عہدیداروں نے بتایا کہ اس تقریب میں 601 کمپنیاں حصہ لیں گی، جن میں 523 بھارتی اور 78 غیر ملکی کمپنی شامل ہیں۔اس میں 14 ممالک کے نمائندے حصہ لیں گے۔
اس پانچ روزہ تقریب میں بڑے پیمانے پر ایئرواسپیس اور دفاعی صنعتوں کی تجارتی نمائش دیکھنے کو ملے گی۔ ایئرو اسپیس صنعتوں میں عالمی رہنماؤں اور بڑے سرمایہ کاروں کے علاوہ اس نمائش میں پوری دنیا کے تھنک ٹینکوں کی حصہ داری بھی نظر آئے گی۔
ایئرواسپیس نمائش کے دوران وزیر دفاع راجناتھ سنگھ، ایئرفورس کے اعلی افسران اور ہندوستان ایئروناٹکس لمیٹیڈ(ایچ اے ایل) کے اعلی افسران کی موجودگی میں آج معاہدے پر دستخط کیے جائیں گے۔ یہ تیجس جنگی طیارہ کی خرید سے متعلق 48 ہزار کروڑ روپئے کا معاہدہ ہے۔حکومت بھارتی فضائیہ کے لیے سرکاری ہندوستان ایئروناٹکس لمیٹیڈ سے 83 تیجس جنگی طیارے خریدنے کی پہل کررہی ہے۔ یہ اب تک کا سب سے بڑا دیسی دفاعی خریداری کا معاہدہ ہوگا۔
وہیں کورونا وبا کے تناظر میں ایئرو انڈیا تقریب دیکھنے آئے ناظرین کے لیے سخت ہدایات بھی جاری کیے گئے ہیں۔اس کے تحت آر ٹی پی سی آر کووڈ جانچ کرانی ہوگی اور لازمی ہے کہ جانچ رپورٹ منفی آئے۔یہ جانچ کی رپورٹ 31 جنوری یا اس کے بعد کی ہونی چاہیے۔کورونا وائرس کی وبا کے پیش نظر طیاروں کی نمائش کے مقام پر ایک دن میں صرف تین ہزار ناظرین کو ہی شرکت کرنے کی اجازت ہوگی۔
تین دنوں کے اس تیاری میں 18 ڈی سی پی، تمام زون کے ایس پی، متعدد اعلی افسران سمیت کل 5000 پولیس اہلکاروں کو تعینات کیا گیا ہے۔بنگلوروں کے پولیس کمشنر کمل پنت نے ای ٹی وی بھارت سے کہا کہ ایلہنکا ائیر فورس اسٹیشن کے مین گیٹ کے سامنے 1500 سے زائد پولیس اہلکار کو تعینات کیا گیا ہے۔
سیکیورٹی کے سخت انتظامات کے تحت ایلہانکا علاقے میں ڈرون کیمرے ، پیراشوٹ، مائکرو لائٹس ، چھوٹے طیارے ، غبارے ، ہوائی گاڑیاں ، روبوٹک آٹوموبائل پر پابندی عائد کی گئی ہے۔ پتنگ اور کبوتر نہ اڑانے کی ہدایت کی گئی ہے۔ بی بی ایم پی نے آس پاس کے علاقے میں گوشت کی فروخت پر 15 دن کے لئے پابندی عائد کردی ہے