عالمی یوم تصویر کشی: لکھنؤ میں منعقدہ تصویری نمائش میں نایاب تصاویر دیکھیں - World Photography Day

19 اگست کو پوری دنیا میں عالمی یوم تصویر کشی منایا گیا، اس موقع پر لکھنؤ کے للت کلا اکیڈمی میں بھی ملک کے الگ الگ مقامات کے فوٹوگرافرز نے اپنی تصویروں کی نمائش کا اہتمام کیا۔

لکھنؤ: فوٹو نمائش کے کنوینر ساحل صدیقی نے ای ٹی وی بھارت سے بات چیت کرتے ہوئے کہا کہ تقریبا 15 برس سے ہم فوٹو نمائش کا اہتمام کرتے ہیں اور فوٹوگرافروں کا حوصلہ افزائی کرتے ہیں۔ ملک کے الگ الگ مقامات سے مختلف شعبے کے فوٹوگرافرس فوٹو بھیجتے ہیں۔ ہمارے یہاں وائلڈ لائف سمیت سماج کے مختلف مسائل کو تصاویر کے ذریعے دکھایا گیا۔

ساحل صدیقی نے بتایا کہ فوٹوگرافرس کی ملازمت بہت ہی سخت اور مشکلات بھری ہوتی ہے، پولیس محکمہ میں پولیس اپنے طور سے ملازمت کرتے ہیں، فوج کے لوگ اپنے طور سے لیکن فوٹوگرافرس ہر حادثات ہر موسم اور ہر مشکلات اور ہر چیلنجز کا سامنا کرتے ہوئے، وہ اپنی کیمروں کی آنکھوں سے دیکھتے ہیں۔ ورلڈ فوٹوگرافی ڈے کے موقع پر ہم ان تمام فوٹوگرافرس کو مبارکباد پیش کرتے ہیں جنہوں نے اپنے کیمرے کے ذریعے انصاف کیا ہے۔

انہوں نے کہا کہ فوٹوگرافرز ہمیشہ کیمروں کی آنکھوں سے دیکھتا ہے اور سماج کے ان دبے کچلے لوگوں کی آواز کو بلند کرنے کی کوشش کرتا ہے، جن کی آواز حکومت سماج اور دیگر اعلی طبقوں تک نہیں پہنچتی ہے۔ آج ہم ان تمام فوٹوگرافرز کو بھی یاد کر خراج عقیدت پیش کر رہے ہیں جنہوں نے اس ملازمت میں اپنی جان گنوائی ہے۔

انہوں نے بتایا کہ خاص طور سے دانش صدیقی کو یاد کر کے خراج عقیدت پیش کر رہے ہیں، جنہوں نے افغانستان کی جنگ میں اپنی جان گنوائیں تھی۔ اس کے علاوہ ملک کے کئی ایسے فوٹوگرافرز ہیں جو اپنی ملازمت کے دوران فوٹوگرافی کرتے وقت جان گنوا دی ان کو بھی ہم خراج عقیدت پیش کر رہے ہیں۔

فوٹو جرنلسٹ دیپک گپتا نے ای ٹی وی بھارت سے بات چیت کرتے ہوئے کہا کہ آج لکھنؤ کے للت کلا اکیڈمی میں نہ صرف لکھنؤ بلکہ ملک کے الگ الگ علاقوں سے فوٹوگرافرز نے اپنی تصویر بھیجی ہے، الگ الگ مسائل کو دکھایا ہے اور ان منتخب تصاویر کو یہاں اویزاں کیا گیا ہے۔

انہوں نے کہا کہ رواں برس بھارت میں ورلڈ کپ میچز کا انعقاد ہوا لکھنؤ میں تقریبا آٹھ میچ ہوئے جس میں، میں بھی شریک ہوا، جس میں بین الاقوامی سطح کے فوٹوگرافرز شامل ہوئے لیکن اس وقت کئی اہم فوٹوز لینے کا موقع ملا اور وہ تصاویر آج اس نمائش کا حصہ بنی ہوئی ہیں۔

انہوں نے کہا کہ ڈیویڈ وارنر کی وہ تصویر جو ایک مشکل کیچ لیتے ہوئے دکھے تھے، وہ تصویر ہم نے ہی کھینچی تھی۔ وراٹ کوہلی اور محمد سمیع کے جشن مناتے ہوئے بھی فوٹو کھینچی تھی، جسے بیسٹ فوٹو کا خطاب ملا تھا۔ انہوں نے مزید بتایا کہ یہ نمائش نہ صرف فوٹو جرنلسٹوں کی حوصلہ افزائی کرتی ہے بلکہ متعدد کالجز یونیورسٹیز کے طلبہ کو بھی بہت کچھ بتاتی ہے کہ وہ اپنا مستقبل فوٹوگرافی میں کیسے بنا سکتے ہیں ۔

واضح رہے ہر برس 19 اگست کو عالمی یوم فوٹوگرافی منایا جاتا ہے اور اس موقع پر فوٹوگرافرز کی ہمت حوصلے کو سراہتے ہوئے ان فوٹوگرافرز کو بھی خراج عقیدت پیش کیا جاتا ہے جنہوں نے اس پیشے میں اپنی جان گنوائی ہے۔