ممتا بنرجی ایک بار پھر مہوا موئترا کی حمایت میں سامنے آئیں

Mamata Support Mahua Moitra: ترنمول کانگریس کی سابق رکن پارلیمنٹ مہوا موئترا نے مغربی بنگال کے ندیا میں وزیر اعلیٰ ممتا بنرجی کے ایک پروگرام میں شرکت کی۔ ندیا ضلع کے شانتی پور میں منعقد پروگرام میں وزیرا علیٰ نے کہا کہ مہوا موئترا کی رکنیت معطل کردی گئی مگر وہ آج بھی عوام کے دلوں میں رہتی ہیں۔ انہوں نے ہمیشہ عوام کے مسائل کو اٹھایا، اس لیے دوبارہ کرشنا نگرسے کامیاب ہوں گی۔

کولکاتا:مہوا موئترا کی رکنیت معطل کیے جانے کے بعد سے ہی ممتا بنرجی موئترا کی حمایت کر رہی ہیں۔ وزیر اعلی نے پانچ دسمبر کو کارشیانگ سے بی جے پی پر بھی تنقید کی تھی، اسی دن مہوا کی رکنیت کو برخاست کیا گیا تھا۔ ممتا بنرجی نے کہا کہ پارٹی مہوا کے ساتھ ہے۔ بی جے پی کی انتقامی سیاست کر رہی ہے۔ مہوا کو دفاع کے لیے کچھ کہنے کا موقع نہیں دیا گیا۔ میں اس کارروائی کے سخت خلاف ہوں۔

آٹھ اکتوبر کو ترنمول کانگریس کی ممبر پارلیمنٹ مہوا موئترا پر سوالات پوچھے جانے کے بدلے رشوت لینے کا الزام عائد کیا گیا تھا۔ بی جے پی ممبر پارلیمنٹ نشیت ڈوبے نے الزام لگایا تھا کہ مہوا موئترا نے رشوت لے کر اڈانی انڈسٹری کے کاروبار کے بارے میں سوالات اٹھائے تھے۔ لوک سبھا اخلاقیات کمیٹی نے مہوا کے خلاف الزامات کی تحقیقات کی۔ اس کے بعد کمیٹی نے ان کی معطلی کی سفارش اسپیکر کو بھیجی اور کہا کہ مہوا کی پارلیمنٹ رکنیت کو ختم کر دیا جانا چاہیے۔ اس کی بنیاد پر مہوا کو پارلیمنٹ کی رکنیت سے محروم کر دیا گیا۔ اس کارروائی کے بعد مرکزی حکومت نے انہیں دہلی میں سرکاری بنگلہ چھوڑنے کا حکم بھی دیا۔

ابتدائی دنوں میں ترنمول کانگریس مہوا موئترا کے ساتھ کھڑی ہوئی نہیں تھی۔ پارٹی کی طرف سے کہا گیا کہ یہ ان کی ذاتی لڑائی ہے اور وہ اس لڑائی کا بخوبی مقابلہ کر رہی ہیں۔ اس وقت گرچہ ترنمول کانگریس ان کے ساتھ کھڑی ہوئی نہیں تھی مگر، ادھیر چودھری، ستارام یچوری، محمد سلیم نے ان کی حمایت کی۔ نومبر میں ممتابنرجی نے ان کی حمایت کی اور نیتا جی انڈور اسٹڈیم میں منعقد پارٹی پروگرام میں پہلی مرتبہ وہ مہوا موئترا کے ساتھ کھڑی ہوئی نظر آئیں۔