سنبھل تشدد: یوپی میں نماز جمعہ کو لے کر ہائی الرٹ، خود ڈی جی پی ہر ضلع پر رکھے ہوئے ہیں نظر

سنبھل تشدد کے بعد یہ پہلا جمعہ ہے۔ نماز جمعہ کے لیے پورے اترپردیش میں ہائی الرٹ جاری کر دیا گیا ہے۔

لکھنؤ: یوپی کے سنبھل میں جامع مسجد کے سروے کے دوران 24 نومبر کو ہوئے تشدد کے بعد یوپی پولیس نے آج نماز جمعہ کو لے کر الرٹ جاری کر دیا ہے۔ پولیس ہیڈ کوارٹر نے تمام اضلاع کے پولیس کپتانوں اور کمشنروں کو حساس مقامات پر چوکس رہنے کی ہدایت کی ہے۔ خاص طور پر سنبھل اور آس پاس کے اضلاع میں پولیس کو ہائی الرٹ پر رکھا گیا ہے۔

ڈی جی پی پرشانت کمار نے ہدایت دی ہے کہ تمام اضلاع کی پولیس اس بات کو یقینی بنائے کہ نماز کے لیے آنے والے لوگوں کی تعداد ہر روز یا ہر جمعہ کی طرح ہو۔ کہیں بھی اضافی لوگوں کو جمع ہونے کی اجازت نہیں ہے۔ اس کے علاوہ علاقے میں باہر کے لوگوں کی نقل و حرکت پر بھی نظر رکھی جائے۔

ڈی جی پی پرشانت کمار نے ہدایت دی ہے کہ، مذہبی رہنماؤں اور امن کمیٹی کے ارکان سے مذاکرات کیے جائیں۔ ڈی جی پی نے پولیس کو ڈرون کے ذریعے حساس مقامات پر نظر رکھنے کی ہدایت دی ہے۔ اس کے علاوہ سوشل میڈیا پر کڑی نظر رکھنے کی بھی ہدایات دی گئی ہیں۔ ڈی جی پی کی ہدایات کے مطابق تمام سوشل میڈیا پلیٹ فارمز کی ہیڈ کوارٹر اور ضلعی سطح پر نگرانی کی جائے گی۔

ڈی جی پی نے خاص طور پر ہدایت دی ہے کہ، کسی بھی افواہ کی فوری تردید کے ساتھ ساتھ اس کو پوسٹ کرنے والوں کے خلاف بھی کارروائی کی جائے اور اس اکاؤنٹ کو بلاک کر دیا جائے۔