پروفیسر مظہر آصف نے جامعہ کے 16ویں وائس چانسلر کا چارج سنبھال لیا

پروفیسر مظہر آصف جے این یو کے طالب علم اور یونیورسٹی ٹاپر رہ چکے ہیں۔ وہ 27 سال کا تعلیمی تجربہ بھی رکھتے ہیں۔

نئی دہلی: تقریباً ایک سال کے انتظار کے بعد بالآخر جامعہ ملیہ اسلامیہ یونیورسٹی کو باقاعدہ وائس چانسلر مل گیا۔ جے این یو کے پروفیسر مظہر آصف نے جمعہ کو جامعہ کے 16ویں وائس چانسلر کا عہدہ سنبھال لیا۔ انہیں قائم مقام وائس چانسلر پروفیسر محمد شکیل نے چارج دے دیا۔ اس موقع پر یونیورسٹی کے پروفیسرز، ایسوسی ایٹ پروفیسرز، اسسٹنٹ پروفیسرز اور دیگر ملازمین موجود تھے۔

اس دوران قائم مقام وائس چانسلر پروفیسر محمد شکیل نے کہا کہ ہم سب کو امید ہے کہ پروفیسر مظہر کی قیادت میں جامعہ ملیہ اسلامیہ آگے بڑھے گی اور ہم اپنی این آئی آر ایف کی درجہ بندی کو بھی بہتر بنائیں گے۔ انہوں نے کہا کہ تین پیرامیٹرز پر ہماری این آئی آر ایف NIRF رینکنگ بہت اچھی رہی ہے اور ہم سب کے ساتھ مل کر دیگر پیرامیٹرز کو بھی بہتر کرنے کی کوشش کریں گے۔

آپ کو بتاتے چلیں کہ جامعہ کی وزیٹر صدر دروپدی مرمو نے یونیورسٹی ایکٹ میں دیے گئے اختیارات کا استعمال کرتے ہوئے جواہر لال نہرو یونیورسٹی (جے این یو) کے اسکول آف لینگویجز کے پروفیسر مظہر آصف کو جامعہ کا نیا وائس چانسلر مقرر کیا ہے۔ ان کی تقرری 5 سال کے لیے ہو گی یا جب تک وہ 70 برس کے نہیں ہوجاتے۔ وہ جے این یو کے سابق طالب علم ہیں اور قومی تعلیمی پالیسی 2020 کی کمیٹی کے رکن بھی رہ چکے ہیں۔

بہار میں پیدا ہوئے، پروفیسر مظہر آصف نے اپنی ابتدائی تعلیم بہار اسکول ایجوکیشن بورڈ سے حاصل کی۔ انہوں نے 1985 میں 10 ویں کلاس اور 1987 میں بہار بورڈ سے 12 ویں کلاس کا امتحان فرسٹ ڈویژن میں پاس کیا۔ اس کے بعد سال 1991 میں دہلی کی جواہر لال نہرو یونیورسٹی سے بی اے آنرز کی ڈگری حاصل کی۔ اس کے بعد انہوں نے 1993 میں فیکلٹی آف آرٹس سے ایم اے کا امتحان پاس کیا اور یونیورسٹی ٹاپر رہے۔

پروفیسر مظہر کا 27 سال کا تعلیمی تجربہ ہے۔ پروفیسر کے عہدہ پر 10 سال سے زائد کا تجربہ رکھنے کے علاوہ ان کے پاس طویل انتظامی تجربہ بھی ہے۔ وہ آسامی، بھوجپوری، انگریزی، ہندی، فارسی، اردو و دیگر زبانوں کے ماہر ہیں۔ 2002 میں، انہوں نے 20 ویں صدی کے پہلے نصف کے دوران ہندوستان میں فارسی زبان اور ادب میں پی ایچ ڈی کیا۔