کیرالہ: فٹبال میدان میں پٹاخے پھٹنے سے 30 سے ​​زائد افراد زخمی

ملاپورم میں فٹ بال میدان میں جشن منانے کے لیے رکھے گئے پٹاخوں کے پھٹنے سے متعدد افراد زخمی ہو گئے۔

ملاپورم: کیرالہ کے ملاپورم میں آری کوڈ کے قریب فٹ بال کے میدان میں پٹاخے پھٹنے سے 30 سے ​​زیادہ افراد زخمی ہوگئے۔ حادثے کے بعد لوگ صدمے میں ہیں۔ زخمیوں کو مقامی اسپتال میں داخل کرایا گیا ہے۔ پولیس واقعے کی جانچ میں مصروف ہے۔

اے این آئی کی رپورٹ کے مطابق فٹبال میدان میں میچ سے قبل افتتاحی تقریب کے دوران پٹاخوں کا ڈھیر پھٹ گیا جس سے میدان میں افراتفری مچ گئی۔ اس دوران بھگدڑ میں کئی لوگ زخمی ہو گئے۔ میچ کی افتتاحی تقریب کے دوران آتش بازی کی جا رہی تھی۔ اسی بیچ ایک چنگاری پٹاخوں کے ڈھیر تک پہنچ گئی جس کی وجہ سے یہ حادثہ رونما ہوا۔ پٹاخوں کے ڈھیر میں زور دار دھماکہ ہوا۔ تماشائی جان بچانے کے لیے ادھر ادھر بھاگنے لگے۔ زخمیوں کی حالت مستحکم بتائی جاتی ہے۔

ذرائع کے مطابق اس حادثے میں کوئی بھی شدید زخمی نہیں ہوا۔ یہ واقعہ فائنل میچ شروع ہونے سے قبل پیش آیا۔ اسی کے پیش نظر آتش بازی کے انتظامات کیے گئے تھے۔ میچ افتتاحی تقریب میں کچھ پٹاخے جلائے جا رہے تھے جس دوران یہ حادثہ پیش آیا۔

آپ کو بتاتے چلیں کہ گذشتہ سال اکتوبر میں کیرالہ کے کاسرگوڈ ضلع میں نیلیشورم کے قریب ایک مندر میں آتش بازی کے حادثے میں 150 سے زیادہ لوگ زخمی ہو گئے تھے۔ اس واقعہ میں بھی پٹاخوں سے نکلنے والی چنگاری پٹاخوں کے ڈھیر تک پہنچ گئی جس کی وجہ سے زبردست دھماکہ ہوا جس کی وجہ سے خواتین اور بچوں سمیت 150 افراد زخمی ہو گئے۔