ہریانہ کے پلوال میں پی این جی پائپ لائن میں آگ لگنے سے ایک شخص ہلاک

جے سی پی کے ذریعہ پانی کی لائن کےلئے گڑھا کھودا جارہا تھا کہ اس دوران پی این جی پائپ لائن میں آگ بھڑک اٹھی۔

پلوال: ہریانہ کے پلوال میں اولڈ جی ٹی روڈ پر پی این جی گیس پائپ لائن میں دھماکے سے منگل کو زبردست آگ لگ گئی۔ آگ نے تین دکانوں اور ایک جے سی بی مشین کو اپنی لپیٹ میں لے لیا، جبکہ قریب میں واقع چائے اسٹال چلانے والا شخص جل کر ہلاک ہو گیا۔ یہ واقعہ اس وقت پیش آیا جب جے سی بی مشین سے پانی کی لائن کے لیے گڑھا کھودا جا رہا تھا۔

تفصیلات کے مطابق آگ شدید تھی جس میں تین دکانیں جلکر خاکستر ہوگئیں۔ پولیس کے مطابق اولڈ جی ٹی روڈ پر پینے کے پانی کی لائین کی مرمت کے لیے جے سی بی مشین کی مدد سے بڑا گڑھا کھودا جا رہا تھا۔ گہری کھدائی کے باعث جے سی بی مشین کا کھدائی کرنے والا حصہ پی این جی گیس پائپ لائن سے ٹکرا گیا جس سے چنگاری نکلنے کے بعد پی این جی گیس لائن میں زبردست آگ بھڑک اٹھی۔

آگ بھڑکنے کے سبب قریبی چائے کی دکان میں رکھا گیس سلنڈر بھی دھماکہ سے پھٹ پڑا، جس کی وجہ سے مزید تین دکانوں کو نقصان پہنچا اور جے سی بی مشین میں بھی آگ لگ گئی۔ جے سی بی مشین کا ڈرائیور اور دیگر مزدور کسی طرح اپنی جان بچانے میں کامیاب رہے لیکن چائے کی دکان چلانے والے ہری پرکاش کی اس حادثہ میں موت ہوگئی۔ اطلاع ملتے ہی فائر بریگیڈ کی گاڑیاں موقع پر پہنچ گئیں اور چند گھنٹوں میں آگ پر قابو پالیا گیا۔ حکام کے مطابق آگ لگنے سے چار موٹر سائیکلیں بھی جل کر خاکستر ہوگئیں۔

ڈی ایس پی پلوال مہیندر نے بتایا کہ آگ لگنے سے ایک شخص کی موت ہوئی ہے اور پورے معاملے کی جانچ جاری ہے۔