بھٹنڈہ: ملک بھر میں تہواروں کے سیزن کے پیش نظر سیکوریٹی کے سخت انتظامات کئے گئے ہیں وہیں پنجاب کے بھٹنڈہ میں بھی پولیس کی جانب سے مناسب انتظامات کئے گئے لیکن اس دوران ایک ناخوشگوار واقعہ پیش آیا جس سے علاقہ میں سنسنی پھیل گئی۔ تفصیلات کے مطابق رات دیر گئے بھٹنڈہ کے پوش علاقے بھارت نگر کے ایک چوک پر شرپسند عناصر نے قومی پرچم کو ایک درخت سے باندھ دیا اور پھر اس پر کوئی آتش گیر مادہ چھڑک کر آگ لگا دی۔
قومی پرچم کو نذرآتش کرنے سے پہلے پورے واقعہ کی ویڈیو بنائی گئی اور اسے سوشل میڈیا پر وائرل کر دیا گیا۔ یہ واقعہ اس وقت سامنے آیا جب ایک راہگیر نے پولیس کو اس کی اطلاع دی۔ اطلاع ملنے پر تھانہ کینٹ اور ڈی ایس پی سٹی 2 سربجیت سنگھ برار جائے وقوعہ پر پہنچ گئے اور تفتیش شروع کردی۔