اے ایم یو پراکٹر آفس کی پارکنگ میں آتشزدگی

Fire Breaks out at AMU Parking علیگڑھ مسلم یونیورسٹی (اے ایم یو) پراکٹر آفس کی پارکنگ میں اچانک آگ لگ گئی جس پر پراکٹوریئل ٹیم نے قابو پالیا۔ اس واقعے میں کسی جانی نقصان کی اطلاع تو نہیں ہے البتہ کچھ پرانی موٹر سائیکل جل گئیں۔

علیگڑھ:ریاست اتر پردیش کے ضلع علی گڑھ میں واقع عالمی شہرت یافتہ تعلیمی ادارہ علیگڑھ مسلم یونیورسٹی (اے ایم یو) کیمپس میں موجود پراکٹر آفس کی پارکنگ میں اچانک آگ لگ گئی۔ آگ شدید تھی جس میں دیکھتے دیکھتے پارکنگ میں کھڑی موٹر سائیکل اور اسکوٹر بھی جل گئے۔ آگ پر کسی طرح پراکٹوریئل ٹیم نے پانی ڈال کر قابو پا لیا ہے، کسی بھی جانی نقصان کی اطلاع نہیں ہے۔

موقعے پر موجود پراکٹوریئل ٹیم کے ملازم محمد عظیم نے صحافیوں کو بتایا محکمہ جنگلات کی جانب سے کچھ پیڑ پودے کٹوائے تھے جس کا کچرہ پڑا ہوا تھا، شاید کسی نے باہر سے کوئی بیڑی یا سگریٹ ڈال دی تھی جس سے آگ لگ گئی ہے، آگ پر قابو پا لیا گیا ہے۔

فیی الحال آگ لگنے کی وجہ تو نہیں معلوم چل پائی ہے، موقعے پر فائر بریگیڈ کی گاڑی بھی نہیں پہنچ پائے تھی لیکن ملازمین نے کسی طرح آگ پر قابو پا لیا۔ اس واقعے میں متعدد گاڑیاں جل گئیں۔ کل کتنی موٹر سائیکلز اور اسکوٹرز میں آگ لگی، تاحال اس کی جانکاری نہیں ہے۔ پورے معاملے کی تفتیش کی جا رہی ہے۔ اس واقعے میں کسی کے زخمی ہونے کی اطلاع نہیں ہے۔