اگست ماہ سے گیا ایئرپورٹ سے شروع ہوگی کارگو سروس - Cargo Plane Service At Gaya Airport

گیا ہوائی اڈہ سے اگست ماہ سے کارگو سروس شروع ہوگی۔ اس سے گیا سمیت ریاست کے تمام اضلاع اور جھارکھنڈ کے کچھ اضلاع کے تاجر کسان اور عام و خاص کو براہ راست فائدہ ہوگا

گیا:ریاست بہار کے ضلع گیا میں واقع انٹرنیشنل ہوائی اڈے پر کارگو سروس جلد شروع ہو جائے گی۔ مرکزی حکومت کی وزرات' محکمہ شہری ہوا بازی' سے اس کی اجازت مل گئی ہے۔

انڈیگو ایئر لائنز سب سے پہلے گھریلو پروازوں میں یہ سروس فراہم کرے گی۔تاہم ابھی اس کی تاریخ کا فیصلہ نہیں کیا گیا ہے لیکن ایئر پورٹ ڈائریکٹر بنکجیت شاہا نے بتایا کہ آئندہ اگست ماہ تک سروس شروع کردی جائے گی۔ کاغذی کاروائی کے ساتھ دیگر تیاریاں مکمل کر لی گئی ہیں۔ کار گو سروس چلانے کا منصوبہ 2017 سے ہے اور اس کی تجویز بھی 2017 کو بھیجی گئی تھی۔

فلحال اس وقت زرعی اور دیگر مصنوعات کی ڈھلائی کولکاتا کارگو ہوائی جہاز کے ذریعہ ہوتی ہے۔ لیکن اگر یہ کاروبار گیا ہوائی اڈے سے منسلک ہو جائے تو یہ کارگو کا مرکز بن سکتا ہے۔ گیا ہوائی اڈہ کے ڈائریکٹر بنگجیت ساہا نے کہا کہ ایئرپورٹ اتھارٹی آف انڈیا سے بھی کارگو سروس شروع کرنے کی منظوری مل گئی ہے۔ انڈیگو ایئر لائنز یہ سروس شروع کرے گی۔ اس کے پیش نظر ایئرپورٹ پر پارکنگ کی سہولیات کو بھی بہتر بنایا گیا ہے۔ کارگو سروس شروع کرنے سے ریاستی حکومت کی صنعتی پالیسی کو فروغ ملے گا۔

لیکن ابھی گھریلو کارگو سروس شروع ہونے جا رہی ہے اگر بین الاقوامی کارگو سروس شروع ہوتی ہے تو یہاں سے زرعی اور دیگر مصنوعات کی بیرون ملک میں مارکیٹنگ کی جائے گی اور اس میں آسانی بھی ہوگی۔ گھریلو سروس شروع ہونے پر بھی کسان ملک کی کئی منڈی میں شامل ہوں گے، نامیاتی فصلوں کو فروغ ملے گا اور پھل پھول اور سبزیاں آسانی سے باہر بھیجی جا سکیں گی۔

بہار اور گیا کے کسانوں کو قومی سطح پر پہچان ملےگی۔ اگر ایئر کارگو ٹرمینل کی تعمیر ہوتی ہے تو اس سے گیا اور آس پاس کی صنعتوں کو فروغ ملے گا ۔ لیکن ابھی ائیر کارگو ٹرمینل بلڈنگ کی تعمیر نہیں ہوگی ، ابھی ایئرپورٹ کی اہم عمارت سے کام ہونگے، اگر گیاسے سامان کی زیادہ سپلائی ہوگی تو پھر کارگو ٹرمینل کی تعمیر ہوگی۔

ایئر کارگو کے آغاز سے گیا کے ہینڈ لوم اور کھادی کے کپڑے ملک بھر میں بھیجا جا سکتا ہے۔ گیا میں سال بھر پیدا ہونے والی سبزیوں میں کدو کریلا بھنڈی بینگن کے علاوہ موسمی دھنیا مولی گاجر ٹماٹر کھیرا ساگ ہرا چنا مکئی مٹرآلو پیاز اور پپیتا شامل ہیں جنہیں آسانی کے ساتھ دوسری ریاستوں میں بھیجا جا سکتا ہے۔

اس سے کسانوں کو اچھی قیمت ملے گی اور ایئر لائنز کو خالی جگہ کا کرایہ بھی ملے گا۔ اگر ایسا ہوتا ہے تو بہار میں ائیرلائنز کارگوکا مرکز بن سکتا ہے جس کا براہ راست فائدہ مقامی لوگوں کو ہی ہوگا۔ایئرپورٹ ڈائریکٹر نے کہاکہ تیاری کرلی گئی ہے اور کوشش ہے کہ اگلے ماہ اگست میں اسکو شروع کردیا جائے۔ آئندہ ہفتہ جائزہ میٹنگ بھی اسکی ہونے والی ہے