کرناٹک لوہا چوری معاملہ: کانگریس ایم ایل اے ستیش سیل کو سات سال کی سزا

کرناٹک کی ایک خصوصی عدالت نے لوہے کی غیر قانونی برآمدگی معاملے میں کانگریس ایم ایل اے ستیش کو سات سال قید کی سزا سنائی۔

بنگلورو:کرناٹک میں ایک خصوصی عدالت نے کاروار کے کانگریس ایم ایل اے ستیش سیل اور دیگر چھ افراد کو بیلے کیری لوہے کی غیر قانونی برآمدگی معاملے میں سات سال قید کی سزا سنائی۔ سنہ 2009-10 کے بیچ ضبط شدہ لوہے کی چوری کر کے اسے برآمد کرنے کے کل چھ معاملات میں، عدالت نے ایم ایل اے ستیش سیل اور بندرگاہ کے اس وقت کے افسر مہیش بلیے کو 24 اکتوبر کو قصوروار قرار دیا تھا۔ عدالت نے سزا کا اعلان سنیچر کو کیا۔

مختلف کسز میں الگ الگ سزا

عدالت نے قصواروں کو فراڈ کیس میں سات سال، سازش کیس میں پانچ سال اور لوہا چوری کیس میں تین سال قید کی سزا سنائی گئی۔ ستیش سیل، پورٹ کنزرویٹر مہیش بلیے، للووہل کمپنی کے مالک پریم چند گرگ، سری لکشمی وینکٹیشور ٹریڈرز کے مالک کھراڈاپوڈی مہیش، سواستیک کمپنی کے مالکان کے وی ناگراج اور گووندراجو، آشاپورہ کمپنی کے مالک چیتن اور آئی ایل سی کمپنی کے مالک سومشیکھر (وفات پا چکے) کو سزا سنائی۔

عدالت نے چھ مقدمات کے سلسلے میں تمام ملزمان کے خلاف 40 کروڑ روپے (6 کروڑ روپے، 9 کروڑ روپے، 9 کروڑ روپے، 9.52 کروڑ روپے، 9.25 کروڑ روپے اور 90 لاکھ روپے) کا جرمانہ بھی عائد کیا۔ اس کے علاوہ عدالت نے کرناٹک حکومت کو جرمانے کی رقم ضبط کرنے کا حکم دیا۔ عدالتی حکم نامے میں بیلکیری سے خام لوہے کی غیر قانونی برآمد سے متعلق چھ مقدمات شامل ہیں۔

سی بی آئی نے 13 ستمبر 2012 کو سپریم کورٹ کے حکم پر بیلے کیری پورٹ کے اس وقت کے پورٹ کنزرویٹر مہیش جے بلیے اور دیگر کے خلاف مقدمہ درج کیا تھا۔ نیز، سی بی آئی نے بندرگاہ پر جنگلات کے اہلکاروں کے ذریعہ ضبط کئے گئے لوہے کی مبینہ چوری کی تحقیقات کے لئے ایک مقدمہ درج کیا تھا۔ سی بی آئی نے کہا کہ محکمہ جنگلات کے اہلکاروں کے ذریعہ ضبط کئے گئے 5,00,000 میٹرک ٹن لوہے میں سے 1,29,553.54 میٹرک ٹن لوہا چوری کر لیا گیا تھا۔

اس کیس کی تحقیقات کرنے والے سابق لوک آیوکت جسٹس سنتوش ہیگڑے نے 'ای ٹی وی بھارت' کو بتایا کہ بیلے کیری پورٹ لوہا کیس میں قصورواروں کو سزا سنانے میں بھلے ہی تاخیر ہو گئی ہو۔ لیکن جب سزا دیر سے سنائی جاتی ہے تو قصورواروں کے لیے اسے پورا کرنا بھی اتنا ہی مشکل ہو جاتا ہے۔ انہوں نے کہا کہ قانون سب کے لیے یکساں ہے، چاہے وہ عام آدمی ہو یا سیاسی لیڈر۔ اس فیصلے سے عدلیہ پر عوام کا اعتماد مزید بڑھے گا۔