جے پور: کپتان سنجو سیمسن کی 82 رنز کی ناٹ آؤٹ نصف سنچری اور ریان پراگ کی 43 رنز کی اننگز کے بعد گیند بازوں کی شاندار کارکردگی کی بدولت راجستھان رائلز نے انڈین پریمیئر لیگ (آئی پی ایل) کے اتوار کو کھیلے گئے چوتھے میچ میں لکھنؤ سپر جائنٹس کو 20 رنز سے شکست دے دی۔
194 رنز کے ہدف کے تعاقب میں لکھنؤ سپر جائنٹس کی شروعات بہت خراب رہی اور اس نے اپنی تین وکٹیں جلد گنوا دیں، کوئنٹن ڈی کاک چار رنز پر، دیودت پڈیکل صفر پر اور آیوش بدونی صرف 11 رنز کے اسکور پر آؤٹ ہو گئے۔
تاہم اوپننگ بلے باز کپتان کے ایل راہل ایک سرے پر رہے۔ انہوں نے 44 گیندوں میں چار چوکوں اور دو چھکوں کی مدد سے 58 رنز کی اننگز کھیلی۔ دیپک ہڈا 13 گیندوں میں 26 رنز بنانے کے بعد آؤٹ ہوئے اور مارکس اسٹونیس تین رنز بنانے کے بعد آؤٹ ہوئے۔
نکولس پوران آخر تک ڈٹے رہے اور 41 گیندوں میں چار چوکوں اور چار چھکوں کی مدد سے ناٹ آؤٹ 64 رنز بنائے۔ کرونل پانڈیا تین رنز بنا کر ناٹ آؤٹ رہے۔ لکھنؤ کی ٹیم مقررہ 20 اوورز میں چھ وکٹ پر صرف 173 رنز بنا سکی اور مقابلہ 20 رنز سے ہار گئی۔
آر آر کی جانب سے ٹرینٹ بولٹ نے دو وکٹیں حاصل کیں۔ ناندرے برجر، روی اشون، یوزویندر چہل اور سندیپ شرما نے ایک ایک بلے باز کو آؤٹ کیا۔ اس سے قبل راجستھان رائلز نے لکھنؤ سپر جائنٹس کو جیت کے لیے 194 رنز کا ہدف دیا تھا۔