کیا ٹیم انڈیا چیمپئنز ٹرافی کھیلنے پاکستان آئے گی؟ پی سی بی چیف کا بڑا بیان - Champions Trophy 2025

چیمپئنز ٹرافی 2025 کی میزبانی پاکستان کرنے والا ہے لیکن اس تعلق سے سب سے بڑا سوال ابھی تک یہی بنا ہوا ہے کیا اس آئی سی سی کے میگا ایونٹ میں بھارت شریک ہوگا یا نہیں۔ بھارت کی جانب سے ابھی تک اس تعلق سے کوئی باضابطہ اعلان نہیں کیا گیا ہے لیکن پاکستان کرکٹ بورڈ کے چیئرمین محسن نقوی نے بڑا دعویٰ کرتے ہوئے کہا ہے کہ ٹیم انڈیا چیمپئنز ٹرافی کھیلنے پاکستان آئے گی۔

حیدرآباد: پاکستان کرکٹ بورڈ (پی سی بی) نے انٹرنیشنل کرکٹ کونسل (آئی سی سی) کے اعلیٰ عہدے کے لیے بی سی سی آئی سیکریٹری جے شاہ کے انتخاب پر پہلی بار اپنی خاموشی توڑی ہے۔

پی سی بی کے چیئرمین محسن نقوی نے کہا کہ انھیں جے شاہ کو اس عہدے پر تعینات کیے جانے پر کوئی تشویش نہیں ہے۔ پاکستانی میڈیا چینل جیو نیوز کے مطابق محسن نقوی نے صحافیوں کو بتایا کہ ہم جے شاہ سے رابطے میں ہیں، ان کے آئی سی سی چیئرمین بننے کی کوئی فکر نہیں ہے۔

اس کے علاوہ پی سی بی کے چیئرمین نے مزید کہا ہے کہ چیمپئنز ٹرافی کا انعقاد صرف پاکستان میں ہی ہوگا اور اس میں تمام آتھ ٹیمیں شرکت کریں گی۔ جس کے بعد اب یہ قیاس آرائیاں پھر سے شروع ہوگئی ہے کہ محسن نقوی کے بیان کے مطابق بھارتی کرکٹ ٹیم اس آئی سی سی ایونٹ میں شرکت کے لیے پاکستان جائے گی۔

واضح رہے کہ جے شاہ یکم دسمبر 2024 کو آئی سی سی کے چیئرمین کے طور پر اپنا عہدہ سنبھالیں گے۔ جبکہ پاکستان کی توجہ اگلے سال آئی سی سی چیمپئنز ٹرافی کی میزبانی پر مرکوز ہے۔ اس تعلق سے نقوی نے تصدیق کی ہے کہ پی سی بی اس حوالے سے بی سی سی آئی سمیت ٹورنامنٹ میں حصہ لینے والی تمام ٹیموں کے بورڈز کے ساتھ رابطے میں ہے۔

قابل ذکر ہے کہ بی سی سی آئی نے ابھی تک چیمپئنز ٹرافی میں شرکت کے لیے ٹیم انڈیا کو پاکستان بھیجنے کے تعلق سےکوئی باضابطہ اعلان نہیں کیا ہے۔ اس سے قبل بی سی سی آئی کے نائب صدر راجیو شکلا نے کہا تھا کہ بھارتی ٹیم اسی وقت پاکستان جائے گی جب بھارتی حکومت انھیں پاکستان جانے کی اجازت دے گی۔

چند روز قبل ہی مرکزی وزیر داخلہ امت شاہ نے ایک نیوز چینل پر کہا تھا کہ پاکستان سے جب تک دہشت گردی جاری رہے گی، تب تک ہمارا ان سے کوئی تعلق قائم نہیں ہوسکتا ہے۔ اب دیکھنا یہ ہوگا کہ 19 فروری سے 9 مارچ تک ہونے والے اس آئی سی سی ٹورنامنٹ کے لیے بھارت پاکستان جائے گا یا نہیں؟