پونچھ دھماکہ معاملے میں دو مشتبہ افراد گرفتار - Blast In Poonch

جموں و کشمیر کے پونچھ میں دیر رات گردوارہ مہنت ساب کے باہر ایک دھماکہ ہوا۔ اس معاملے میں دو مشتبہ افراد کو گرفتار کر لیا گیا ہے۔

پونچھ: جموں و کشمیر کے پونچھ ضلع میں ہسپتال اور گردوارہ کے پاس ہوئے دھماکے میں دو مشتبہ افراد کو حراست میں لیا گیا ہے۔ غور طلب ہو کہ منگل کی رات دیر گیے پونچھ قصبے کے ضلع اسپتال کے نزدیک واقع ایک مذہبی مقام کے نزدیک دھماکہ ہوا، جس سے مقامی لوگوں میں خوف و ہراس کا ماحول ہے۔ پولیس نے بتایا کہ پونچھ ہسپتال کے قریب ایک علاقے سے کم شدت کے مشتبہ دھماکے جیسی آواز کی اطلاع ملی ہے۔ دھماکے کی اصل نوعیت کا پتہ لگانے کے لیے معاملے کی ضروری تحقیقات شروع کر دی گئی ہے۔ واضح رہے کہ حکام نے بتایا کہ دھماکے کے سلسلے میں دو مشتبہ افراد کو پوچھ گچھ کے لیے حراست میں لیا گیا ہے۔

اس معاملے میں حکام کا کہنا ہے کہ دھماکہ ہوتے ہی پولیس اور فوج کے جوانوں نے علاقے کو گھیرے میں لے لیا۔ فارنسک ماہرین کو جائے حادثہ پر بھیج دیا گیا ہے۔ تاہم ابتدائی تحقیقات سے لگتا ہے کہ عسکریت پسندوں نے چینی گرینیڈ پھینک کر حملہ کیا جس سے دھماکہ ہوا۔ قابل ذکر ہو کہ فارنسک رپورٹ سے واضح ہو جائے گا کہ یہ دھماکہ کس نوعیت کا تھا۔ فی الحال جائے وقوعہ پر سکیورٹی اہلکار جمع ہیں اور اس واقعے کی تفصیل سے تفتیش کر رہے ہیں۔ ہر طرف سے علاقے کی تلاشی لی جا رہی ہے۔