پلوامہ سے دہشت گردی کا نام مٹانا ہے تو سو فیصد ووٹ دیں: بی جے پی ضلع صدر - Lok Sabha Election 2024

ضلع صدر بی جے پی محمد لطیف بٹ نے پلوامہ کے عوام سے اپیل کی ہے کہ وہ اگر شہر کی ترقی چاہتے ہیں اور پلوامہ سے دہشت گردی ختم کرنا چاہتے ہیں، اس کی منفی امیج بدلنا چاہتے ہیں تو ان کو زیادہ سے زیادہ ووٹ ڈالنا ہوگا۔

پلوامہ:اس وقت پورے بھارت میں لوک سبھا الیکشن 2024 کے سلسلے میں انتخابی مہم عروج پر ہے اور سیاسی پارٹیاں عوام سے اپنے اپنے امیدوار کے حق میں ووٹ دینے کی اپیل کر رہی ہیں۔ تمام سیاسی پارٹیاں اپنے اپنے امیدواروں کو جتانے کے لئے ایڑی چوٹی کا زور لگا رہی ہیں۔ جموں کے ضلع پلوامہ میں بھی انتخابی ریلیوں کا اہتمام بڑے زور و شور سے جاری ہے۔

جموں کشمیر میں بھی اس کا اثر دیکھا جا سکتا ہے جہاں پر کانگریس اور بی جے پی دونوں ہی اپنے اپنے امیدواروں کو جتانے کے لئے کوشاں ہیں۔ ہر ایک پارٹی عوام کو راغب کرنے کے لیے نئے نئے اور بڑے بڑے وعدے کر رہی ہے۔ وہیں بی جے پی کی جانب سے بھی انتخابی تشہیر کا سلسلہ جاری ہے جس کے تحت وہ بھی عوام سے اپیل کررہی ہے کہ عوام ان انتخابات میں بڑھ چڑھ کر حصہ لیں کیونکہ زیادہ ووٹنگ ہی ان کو جیت سے ہمکنار کرا سکتی ہے۔

اس سلسلے میں بھارتیہ جنتا پارٹی کے ضلع صدر پلوامہ محمد لطیف احمد بھٹ نے ضلع پلوامہ کے عوام سے اپیل کی کہ وہ آنے والے پارلیمانی انتخابات میں بڑھ چڑھ کر حصہ لیں اور مستحق امیدوار کے حق میں ووٹ دیں تاکہ ترقیاتی کاموں کو دوبارہ شروع کیا جا سکے۔

لطیف احمد بٹ نے کہا کہ ضلع پلوامہ ماضی کی سرگرمیوں کی وجہ سے دہشت گردی کی سرزمین کے طور پر ملک بھر میں جانا جاتا تھا جس کو مٹانے کے لیے انہوں نے عوام سے اپیل کی کہ وہ انتحابات میں حصہ لیں اور ضلع پلوامہ کی جو شناخت بنا دی گئی ہے، اسے مٹا دیں۔ یہ تب ہی ممکن ہو گا جب ہم اپنے پسندیدہ اور سماج کے لئے موزوں امیدوار کا خطاب کریں۔