اسلامک یونیورسٹی اونتی پورہ میں سہ روزہ آیوش کانفرنس کا اہتمام

اسلامک یونیورسٹی آف سائنس اینڈ ٹکنالوجی اونتی پورہ میں جمعرات کو سہ روزہ " آیوش کانفرنس کا انعقاد کیا گیا۔

اونتی پورہ:اسلامک یونیورسٹی آف سائنس اینڈ ٹکنالوجی اونتی پورہ میں جمعرات کو "آیوش برائے صحت مند زندگی: انٹگریٹنگ انڈین اینڈ ماڈرن سسٹم آف میڈیسن" کے موضوع پر سہ روزہ بین الاقوامی کانفرنس کا انعقاد کیا گیا۔ کانفرنس کا افتتاح ڈاکٹر این ظہیر احمد ڈاریکٹر جنرل سینٹرل کونسل فار ریسرچ اینڈ یونانی میڈیسن نے کیا جب کہ اس موقعے پر وائس چانسلر پروفیسر شکیل احمد رومشو اور دیگر عہدیدار بھی موجود تھے۔

یہ تقریب متعدد طبی پیشہ ور افراد کو اکٹھا کرنے، روایتی اور جدید نظام علاج پر تبادلہ خیال کرنے کے مقصد سے منعقد کی گئی۔ اس کانفرنس میں ملک اور دنیا بھر سے اسکالرز اور پریکٹیشنرز شرکت کر رہے ہیں۔

سکمز صورہ کے ڈائریکٹر پروفیسر محمد اشرف گنائی نے اپنے خطاب میں یونیورسٹی کی جانب سے اس طرح کا پروگرام منعقد کرانے پر انتظامیہ کا شکریہ ادا کیا۔

مہمان خصوصی ڈاکٹر این ظہیر احمد نے بتایا کہ ملک کے ساتھ ساتھ بین الاقوامی سطح پر بھی آیوش طرز علاج مقبول ہو رہا ہے۔ میڈیا کے ساتھ بات کرتے ہوئے اسلامک یونیورسٹی کے وائس چانسلر پروفیسر شکیل احمد رومشو نے بتایا کہ سہ روزہ کانفرنس کے دوران سو سے زیادہ ریسرچ پیپرز پڑھے گئے اور متعدد پیشہ ور ماہرین نے اپنے خیالات کا اظہار کیا۔ آج کانفرنس کا آخری دن ہے۔