سرینگر لیہہ شاہراہ پر ٹریفک بحال - Srianagar Leh Highway Reopens

Srianagar Leh Highway Reopensسرینگر لیہہ شاہراہ پر مسلسل پانچ روز تک ٹریفک بند رہنے کے بعد حکام نے درماندہ گاڑیوں کو کرگل کی جانب روانہ ہونے کی اجازت دی۔

گاندربل (جموں کشمیر) :پانچ روز تک مسلسل بند رہنے کے بعد جمعرات کو سرینگر لیہہ شاہراہ پر مسافر گاڑیوں کو کرگل کی جانب روانہ ہونے کی اجازت دی گئی۔ گزشتہ ہفتے کو ہوئی موسلادھار بارشوں اور زوجیلا پاس پر برفانی تودے اور چٹانیں کھسکنے کے بعد انتظامیہ نے لداخ شاہراہ کو گاڑیوں کی آمد رفت کے لئے عارضی طور پر بند کر دیا تھا۔

لداخ شاہراہ پر ٹریفک معطل ہونے کی وجہ سے شاہراہ کے دونوں طرف سینکڑوں گاڑیاں درماندہ ہوگئی تھیں، جس کے بعد بیکن اہلکاروں نے سونہ مرگ کی طرف سے جبکہ پروجیکٹ ویجیک نے منی مرگ کی طرف سے زوجیلا درے سے برف ہٹانے کا کام شروع کیا تھا۔ زوجیلا درے پر برف ہٹائے جانے کے بعد متعلقہ اہلکاروں محکمہ ٹریفک نے شاہراہ کا معائنہ کیے جانے کے بعد ہی ٹریفک کی نقل و حمل کی اجازت دی۔

حکام نے اولاً درماندہ گاڑیوں کو ہی اپنی اپنی منزلوں کی جانب روانہ ہونے کی اجازت دی تاہم ڈرائیوروں سے احتیاط برتنے کی بھی اپیل کی گئی ہے۔ ادھر، محکمہ ٹریفک نے سرینگر لیہہ شاہراہ پر سفر کرنے کے خواہشمند مسافروں سے محکمہ ٹریفک سے رجوع کرنے اور حکام کی جانب سے گرین سگنل ملنے کے بعد ہی سرینگر لیہہ شاہراہ پر سفر کرنے کی تلقین کی ہے۔ یاد رہے کہ سرینگر جموں قومی شاہراہ، تاریخ مغل روڈ اور سرینگر لیہہ شاہراہ بھی موسلا دھار بارشوں، مٹی، برف کے تودے گرآنے، چٹانیں کھسکنے اور برفباری کے سبب سرما کے بیشتر ایام میں بند رہتی ہیں۔