کٹھوعہ میں سرچ آپریشن بدھ کو بھی جاری رہا - CASO Continues in Kathua

CASO Enters into Second Day in Kathua: صوبہ جموں کے کٹھوعہ ضلع میں مصلح افراد کو دیکھے جانے کے بعد سیکورٹی ایجنسیز نے علاقے کو محاصرے میں لیا جو بدھ کے روز بھی جاری ہے۔

کٹھوعہ(جموں کشمیر): جموں صوبے کے کٹھوعہ ضلع میں منگل کی صبح شروع کیا گیا سرچ آپریشن بدھ کو دوسرے روز بھی جاری رہا۔ ضلع کے جوتھانہ علاقے میں پیر کی رات مصلح افراد کو دیکھے جانے کی اطلاع موصول ہونے کے بعد جموں و کشمیر پولیس اور فوج کی مشترکہ ٹیم نے علاقے کو محاصرے میں لیکر سرچ آپریشن شروع کر دیا۔ ضلع کے جوتھانہ علاقے میں شروع کیے گئے آپریشن کا دائرہ دوسرے روز وسیع کرتے ہوئے سیکورٹی فورسز نے بلور کے بھینی نالے کے اطراف بھی تلاشی کارروائی انجام دی۔

ذرائع کے مطابق پیر کی رات چار مسلح افراد کو پولیس چوکی جاکھول کے تحت آنے والے جوتھانہ گاؤں میں دیکھا گیا جنہوں نے ایک گھر میں داخل ہوکر وہاں موجود خاتون سے کھانے کا مطالبہ کیا۔ مسلح افراد کو دیکھ کر گھر میں موجود خاتون نے پڑوسیوں کو جمع کیا جس کے پیش نظر ’’مصلح افراد‘‘ وہاں سے فرار ہو گئے تاہم مقامی باشندوں نے فوری طور پر پولیس کو مطلع کر دیا۔

پولیس نے فوج کے ساتھ مل کر پیر اور منگل کی درمیانی شب علاقے کو محاصرے میں لے لیا جو بدھ کے روز بھی جاری رہا۔ سیکورٹی فورسز کی جانب سے ہیلی کاپٹر اور ڈرون کے ذریعے بھی جنگلاتی اور پہاڑی علاقوں کی نگرانی کی جا رہی ہے۔ بتایا جا رہا ہے کہ ضلع پولیس نے سبھی پولیس اسٹینز، چوکیوں اور پولیس ناکوں کے انچارجز کو چوکس رہنے کی ہدایت جاری کی ہے۔ کئی مقامات پر اضافی چوکیاں قائم کرکے گاڑیوں کی چیکنگ بھی شروع کر دی گئی ہے۔