پاکستان اور افغانستان، جموں و کشمیر میں منشیات کے بڑے ذرائع: ڈپٹی کمشنر شوپیان کی پریس کانفرنس

شوپیان کے ڈپٹی کمشنر شاہد سلیم نے کہا کہ پاکستان اور افغانستان سے جموں و کشمیر اور پنجاب کو منشیات اسمگلنگ کی جارہی ہے۔

شوپیان : ڈپٹی کمشنر شوپیاں، شاہد سلیم نے آج ایک پریس کانفرنس میں جموں و کشمیر میں منشیات کی بڑھتی ہوئی لعنت پر گہری تشویش کا اظہار کیا۔ انہوں نے پاکستان اور افغانستان کو منشیات کی فراہمی کے بنیادی ذرائع قرار دیتے ہوئے کہا کہ منشیات کو ڈرونز کے ذریعے مخصوص علاقوں میں اسمگل کیا جا رہا ہے۔

ڈی سی شاہد سلیم نے بتایا کہ نوجوانوں، خاص طور پر لڑکیوں میں منشیات کی بڑھتی ہوئی لت تشویشناک ہے۔ انہوں نے والدین پر زور دیا کہ وہ اپنے بچوں کی سرگرمیوں اور دوستیوں پر گہری نظر رکھیں۔ انہوں نے کہا کہ منشیات کا ناسور تیزی سے پھیل رہا ہے، جسے روکنے کے لیے سخت اقدامات کی ضرورت ہے۔ قانون نافذ کرنے والے ادارے منشیات فروشوں کے خلاف کارروائی کر رہے ہیں اور اس کے سپلائی چین کو توڑنے کے لیے کوشاں ہیں۔

شاہد سلیم نے مزید کہا کہ معاشرے کے ہر طبقے، بالخصوص مذہبی رہنماؤں، اساتذہ اور سول سوسائٹی کو منشیات کے خلاف مہم میں بڑھ چڑھ کر حصہ لینا چاہیے۔ انتظامیہ نے منشیات فروشوں کے خلاف سخت کارروائی کا عندیہ دیا ہے اور متاثرہ افراد کے لیے بحالی پروگراموں کو فروغ دینے کی یقین دہانی کرائی ہے۔ سرحدی علاقوں میں نگرانی مزید سخت کر دی گئی ہے۔