ہماری لڑائی نیشنل کانفرنس یا کسی دوسری پارٹی سے نہیں بلکہ بھارتیہ جنتا پارٹی سے ہے: وحید الرحمان پرہ - Assembly Elections in JK

جموں و کشمیر اسمبلی انتخابات کے لئے پہلے مرحلے کے لئے پرچہ نامزدگی داخل ہوچکے ہیں۔ پہلے مرحلے کے لئے امیدوار اپنے اپنے حلقہ میں انتخابی مہم میں مصروف ہیں۔ جموں و کشمیر میں تقریبا ایک دہائی بعد اسمبلی انتخابات منعقد ہورہے ہیں۔

پلوامہ: پہلے مرحلے میں اسمبلی انتخابات میں حصہ لینے والے امیدواروں نے اپنی انتخابی مہم شروع کر دی ہے اور اسمبلی حلقوں کے مختلف علاقوں کا دورہ کر کے اپنے منشور کو عام کر رہے ہیں۔ جنوبی کشمیر کے ضلع پلوامہ میں 4 اسمبلی حلقوں پر انتخاب لڑنے والے امیدواروں نے بھی ووٹروں کی توجہ مبذول کرنے کے لیے اپنے منشور کو عام کرتے ہوئے اپنی انتخابی مہم شروع کر دی ہے۔

پیپلز ڈیموکریٹک پارٹی کے امیدوار برائے پلوامہ اسمبلی حلقہ وحید الرحمان پرہ اپنی انتخابی مہم چلا رہے ہیں اور حلقہ اسمبلی کے مختلف علاقوں کا دورہ کر کے لوگوں سے بات کر رہے ہیں اور اپنے منشور کو عام کر رہے ہیں۔ اس سلسلے میں وحید الرحمن پرہ نے میڈیا سے بات کرتے ہوئے کہا کہ ضلع پلوامہ تمام شعبوں میں سرفرست ہونے کے باوجود ضلع پلوامہ کو منفی تصویر کے ساتھ دیکھا جا رہا ہے اور پارٹی کی اولین توجہ ضلع پلوامہ کے مثبت امیج کو عام کرنا ہے۔

انہوں نے کہا کہ ان کی لڑائی نیشنل کانفرنس یا کسی دوسری پارٹی کے خلاف نہیں ہے بلکہ بی جے پی کے ساتھ ہے کیونکہ انہوں نے مختلف ہتھکنڈوں سے جموں و کشمیر کے عام لوگوں کو دبایا ہے۔ انہوں نے مزید کہا کہ پارٹی کی بنیادی توجہ روزگار پیدا کرنے، صحت کی دیکھ بھال کی سہولیات کی ترقی، سڑک کے بنیادی ڈھانچے کی ترقی اور جموں وکشمیر کی مجموعی ترقی کے علاوہ جیلوں کے اندر بند جموں و کشمیر کے قیدیوں کو بڑے پیمانے پر معافی دینے پر مرکوز رہے گی۔