ممبر پارلیمنٹ آغا روح اللہ نے دہلی میں میرواعظ عمر فاروق سے ملاقات کی

نیشنل کانفرنس کے رکن پارلیمنٹ آغا سید روح اللہ مہدی نے حریت کانفرنس کے سربراہ میر واعظ عمر فاروق سے دہلی میں ملاقات کی۔

سری نگر: 29 جنوری (پی ٹی آئی) نیشنل کانفرنس کے رکن پارلیمنٹ آغا سید روح اللہ مہدی نے بدھ کو علیحدگی پسند رہنما اور حریت کانفرنس کے سربراہ میر واعظ عمر فاروق سے دہلی میں ملاقات کی۔ دونوں رہنماؤں کے قریبی ذرائع نے بتایا کہ مہدی نے میرواعظ سے ملاقات کی اور جموں و کشمیر و ملک میں مسلم مسائل پر تبادلہ خیال کیا۔ میرواعظ 24 جنوری کو وقف بل پر مشترکہ پارلیمانی کمیٹی سے ملاقات کے بعد سے دہلی میں ہیں۔

ذرائع نے بتایا کہ دونوں سیاسی قائدین، جن کا تعلق متوازی سیاسی نظریات کے ساتھ ہے، نے ایک گھنٹہ سے زیادہ طویل بات چیت کی جس میں آرٹیکل 370 کی منسوخی کے بعد جموں و کشمیر کی صورت حال، ریاستی حیثیت کی بحالی اور سیاسی قیدیوں کی رہائی سمیت وسیع مسائل پر بات چیت ہوئی۔ ذرائع نے مزید کہا کہ دونوں رہنماؤں نے وقف ترمیمی بل، ملک میں مسلمانوں کی حالت زار، 5 اگست 2019 کے بعد کشمیر کی صورتحال اور دیگر مسائل کے بارے میں بھی بات کی۔

میرواعظ نے واضح کیا تھا کہ این سی لیڈر نے ان سے کشمیر کے میرواعظ یعنی انکے دینی منصب کی حیثیت سے ملاقات کی تھی۔ مذہبی رہنما نے کہا، "ہاں، وہ ( آغا سید مہدی) مجھ سے ملنے آئے تھے۔ وہ پارلیمنٹ کے اجلاس کے لیے دہلی میں ہیں اور انوں نے جزبہ خیر سگالی کے تحت ملاقات کی۔ مہدی اور میر واعظ نے جموں و کشمیر کے نوجوانوں کے مسائل کے ساتھ ساتھ متنازع ریزرویشن پالیسی پر بھی بات کی۔

آغا سید مہدی وزیر اعلیٰ عمر عبداللہ کی سرینگر میں رہائش گاہ کے باہر موجودہ ریزرویشن پالیسی کے خلاف احتجاج میں حصہ لیا تھا ۔ اس احتجاج میں میرواعظ عمر فاروق نے بھی اپنی جماعت کے ایک وفد کو بھیجا تھا۔ ایم پی کے اس اقدام پر ان کی اپنی پارٹی کی طرف سے شدید ردعمل سامنے آیا تھا، ان کے کچھ ساتھیوں کا کہنا تھا کہ ممتاز شیعہ رہنما توجہ بٹورنے کیلئے ایسی سرگرمیاں کررہے ہیں اور انہوں نے پارٹی کے مخالفین کو بھی موقعہ فراہم کیا ہے۔

عبداللہ نے اس ماہ کے شروع میں میڈیا کے نمائندوں کے ساتھ بات چیت میں کہا تھا کہ جب مہدی کے احتجاج میں شرکت پارٹی کے اندر جمہوریت کی عکاسی کرتی ہے، وہ توقع کرتے ہیں کہ لوک سبھا کے رکن دہلی میں ریاست کی بحالی کے لیے ایسا ہی احتجاج منظم کریں گے۔ حال ہی میں نائب وزیر اعلیٰ سریندر کمار چودھری اور وزیر اعلیٰ کے مشیر ناصر اسلم وانی نے بڈگام میں مہدی کی رہائش گاہ پر ان سے ملاقات کی۔