’ماضی میں الیکشن بائیکاٹ کے لئے این سی، پی ڈی پی ذمہ دار‘ - NC PDP Responsible for Boycott

جموں کشمیر میں تین مراحل میں انتخابات 18اور 25ستمبر اور یکم اکتوبر کو ہوں گے۔ ان دنوں جموں کشمیر میں انتخابی تشہیری مہم زوروں پر ہے اور امیدوار اپنے حریفوں کی تنقید کرنے میں کوئی کسر باقی نہیں چھوڑ رہے۔

پلوامہ (جموں کشمیر) :بارشوں کے باوجود جنوبی کشمیر کے ضلع پلوامہ میں امیدوار اسمبلی انتخابات کے پہلے مرحلے کے لیے اپنی اپنی مہم چلا رہے ہیں، اور ووٹروں کو لبھانے کے لیے نہ صرف وعدے کیے جا رہے ہیں بلکہ سیاسی حریفوں پر تنقید کا سلسلہ بھی جاری ہے۔ ضلع پلوامہ کی راجپورہ اسمبلی نشست پر مدثر حسن نامی ایک امیدوار عام آدمی پارٹی (عآپ) کی ٹکٹ پر سیاسی قسمت آزما رہے ہے۔ اس حلقے پر کل 10 امیدوار ہیں۔ اور عام آدمی پارٹی پہلی بار جموں و کشمیر کے اسمبلی انتخابات میں حصہ لے رہی ہے۔

عام آدمی پارٹی کے راجپورہ اسمبلی حلقہ کے امیدوار مدثر حسن راجپورہ اسمبلی حلقہ پر لوگوں سے رابطہ کر قائم کرکے ان سے ووٹ بٹورنے کے لیے عام آدمی پارٹی کے منشور کی تشہیر کر رہے ہیں۔ مدثر حسن مین چوک، راجپورہ میں اشتہاری مہم کے تحت خطاب کرتے ہوئے نیشنل کانفرنس (این سی) اور (پی ڈی پی) پر تنقید کی اور کہا: ’’یہ وہی لوگ ہیں جنہوں نے جموں و کشمیر کے لوگوں کو دھوکہ دیا اور جموں و کشمیر کی موجودہ صورتحال کے لئے بھی یہی ذمہ دار ہیں۔‘‘

عام آدمی پارٹی امیدوار، مدثر حسن، کی پلوامہ میں انتخابی تشہیری مہم (ای ٹی وی بھارت)

مدثر حسن نے الزام عائد کرتے ہوئے کہا: ’’این سی اور پی ڈی پی نے ہی ماضی میں الیکشن بائیکاٹ کی کال کو تقویت دی تاکہ الیکشن میں جمہوری طرز پر ووٹ نہ ہو اور ان کے کارندے ان کے نمائندوں کو ووٹ دیکر کامیاب بنا سکیں۔‘‘ یاد رہے کہ این سی اور پی ڈی پی پر اس سے قبل بھی الیکشن بائیکاٹ کی خفیہ حمایت کے اعلانات عائد ہوتے رہے ہیں۔ وہیں آج بی جے پی کے سابق قومی صدر اور سینئر لیڈر رام مادھو نے این سی اور پی ڈی پی پر عسکریت پسندوں کی حمایت سے الیکشن مہم چلانے کا الزام عائد کیا۔