قومی یوم سیاحت: منوج سنہا کی سیاحوں کو جموں و کشمیر آنے کی دعوت

Tourists Visited Kashmir سرکاری اعداد و شمار کے مطابق سال 2023 کے دوران زائد از 2 کروڑ سیاح جموں وکشمیر کے خوبصورت نظاروں سے لطف اندوز ہوئے۔

سرینگر: جموں و کشمیر کے لیفٹیننٹ گورنر منوج سنہا نے قومی یوم سیاحت کے موقع پر سیاحوں کو جموں وکشمیر کی قدرتی خوبصورتی سے لطف اندوز ہونے یہاں آنے کی دعوت دی ہے۔

انہوں نے جمعرات کو سماجی رابطہ گاہ 'ایکس' پر اپنے ایک پوسٹ میں کہا: 'جنت میں خوش آمدید! قومی یوم سیاحت پر میں سیاحوں اور کھوج کرنے والوں کو دعوت دیتا ہوں کہ وہ جموں و کشمیر آکر یہاں کی قدرتی خوبصورتی، بہترین کھانوں، متحرک ثقافت اور غیر معمولی آف بیٹ سیاحتی مقامات اور تاریخ سے لطف اندوز ہوجائیں'۔

بتادیں کہ ملک میں 25 جنوری کو قومی یوم سیاحت کے طور پر منایا جاتا ہے، تاکہ لوگوں کو سیاحت کی اہمیت و افادیت سے آگاہ کیا جاسکے۔جموں و کشمیر اپنے منفرد قدرتی حسن و جمال کے باعث دنیا بھر کے سیاحوں کے لئے انتہائی پر کشش ہے۔سال 2023 کے دوران ریکارڈ توڑ تعداد میں سیاحوں نے جموں وکشمیر کی سیر کی۔

سرکاری اعداد و شمار کے مطابق سال 2023 کے دوران زائد از 2 کروڑ سیاح جموں وکشمیر کے خوبصورت نظاروں سے لطف اندوز ہوئے۔واضح رہے کہ مرکزی وزیر سیاحت جی کشن ریڈی نے حال ہی میں راجیہ سبھا میں ضمنی سوالات کے جواب میں کہا کہ آرٹیکل 370 ہٹائے جانے کے بعد رواں سال کے آخری 11 مہینوں میں جموں و کشمیر میں دو کروڑ سیاحوں نے جموں و کشمیر کی سیر کی ، جو کہ تاریخ میں ایک ریکارڈ ہے۔

(یو این آئی مشملات کے ساتھ)