ڈاڈسرہ ترال میں زیارت گاہ اور مسجد کی بے حرمتی میں ملوث شرپسند گرفتار: پولیس - DESECRATION OF MOSQUE IN TRAL

Desecration Of Mosque In Tral: اونتی پورہ پولیس نے ڈاڈسرہ ترال میں زیارت گاہ اور مسجد کی بے حرمتی میں ملوث شخص کو گرفتار کرلیا ہے۔ اس سلسلہ میں پولیس کی جانب سے عوام سے اپیل کی گئی ہے کہ کسی بھی افواہ پر مشتعل نہ ہوں۔

ڈاڈسرہ ترال:پولیس نے جنوبی کشمیر کے ترال علاقہ میں گزشتہ روز مسجد اور ایک زیارت گاہ کی بے حرمتی کرنے اور شیشے توڑنے میں ملوث ایک شخص کو گرفتار کرنے کا دعویٰ کیا ہے۔ اپنے ایک بیان میں پولیس نے بتایا ہے کہ اونتی پورہ پولیس نے شواہد کی بنیاد پر جرم کے مرتکب منظور احمد ساکن ترال بالا کو گرفتار کر کے سلاخوں کے پیچھے دھکیل دیا ہے۔ تاہم پولیس کے بیان کے مطابق مذکورہ شھری ذہنی طور پر معذور ہے اور اس طرح کے واقعات پہلے بھی انجام دیتا آ رہا ہے۔

پولیس نے عوام سے اپیل کی ہے کہ وہ کسی بھی افواہ پر کان نہ دھریں اور اپنے مفادات کے حصولی کے لیے ماحول کو خراب کرنے والے عناصر کی سازشوں سے ہوشیار رہیں۔ واضح رہے کہ جمعرات اور جمعہ کی رات ترال کے ڈاڈسرہ میں زیارت گاہ اور کئی مسجد کے شیشے توڑے گئے تھے اور مذہبی کتابوں کی بے حرمتی کی گئی تھی۔ جس کے بعد کل ایس ایس پی اونتی پورہ اعجاز زرگر نے از خود علاقہ کا دورہ کرکے صورتحال کا جائزہ لیا اور واقعہ میں ملوث افراد کے خلاف باضابطہ ایف آئی آر درج کرنے کے احکامات صادر کیے تھے۔