میرواعظ کو جامع مسجد میں نماز جمعہ ادا کرنے کی اجازت نہیں ملی - Mirwaiz not allowed to offer Friday prayers

Mirwaiz not allowed to offer Friday prayers جموں و کشمیر میں سرینگر کی جامع مسجد میں نماز جمعہ ادا کرنے اور واعظ کرنے سے ایک مرتبہ پھر میرواعظ مولوی محمد عمر فاروق کو روک دیا گیا۔ انجمن اوقاف جامع مسجد سرینگر نے حکام کے رویہ پر تنقید کی۔

سرینگر: میر واعظ مولوی محمد عمر فاروق کو آج نماز جمعہ کا خطبہ جامع مسجد سرینگر میں دینے کی اجازت نہیں دی گئی اور حکام کی جانب سے انہیں ایک مرتبہ پھر گھر پر نظر بند رکھا گیا۔انجمن اوقاف جامع مسجد سرینگر کےمطابق میرواعظ عمر فاروق کو حکام نے مطلع کیا ہے کہ انہیں گھر میں نظر بند کر دیا گیا ہے اور انہیں آج جمعہ کا خطبہ دینے اور نماز پڑھنے کے لیے جامع مسجد جانے کی اجازت نہیں دی جارہی ہے۔

ایسے میں انجمن اوقاف جامع مسجد سرینگر نے اوقاف کے سربراہ اور میرواعظ کشمیر مولوی محمد عمر فاروق کو ایک بار پھر ان کی رہائش گاہ میں نظر بند کرکے انہیں اپنے منصبی اور مذہبی فرائض کی ادائیگی پر قدغن عائد کئے جانے پر شدید افسوس کا اظہار کیا ہے۔ بیان میں کہا گیا ہے میرواعظ کی بار بار نظر بندی خاص کر جمعتہ المبارک کے موقعہ پر جبکہ مرکزی جامع مسجد میں ان کا وعظ و تبلیغ سننے کیلئے ہزاروں لوگ منتظر رہتے ہیں۔ موصوف کو نظر بند کرنے کے نتیجے میں نہ صرف ان ہزاروں لوگوں کو مایوس لوٹنا پڑ رہا ہے بلکہ حکام کے اس رویہ سے عوامی جذبات بھی شدید مجروح ہو رہے ہیں۔

واضح رہے کہ میرواعظ مولوی محمد عمر فارق کشمیر کی تاریخی جامع مسجد سرینگر کے خطیب ہیں جبکہ یہ کُل جماعتی حریت کانفرنس کے چیئرمین بھی ہیں۔