گلمرگ میں کھیلو انڈیا کے چوتھے مرحلے کا آج سے آغاز

Khelo India At Gulmarg گلمرگ میں کھیلو انڈیا کے چوتھے مرحلے کا جوش وخروش کے ساتھ آغاز ہو گا۔مقامی نوجوان بلند حوصلوں کے ساتھ کھیلو انڈیا کے مقابلوں میں شرکت کریں گے۔ مقامی باشندوں میں کھیلو انڈیا کے مقابلوں کو لے کر زبردست جوش و خروش پا یا جا رہا ہے۔

گلمرگ: مرکز کے زیر انتظام یوٹی جموں و کشمیر کے گلمرگ میں کھیلو انڈیا کے چوتھے مرحلے کے مقابلوں کا سلسلہ آج سے شروع ہوگا۔ اس مرتبہ گلمرگ میں منعقدہ کھیلو انڈیا میں جموں و کشمیر کے تمام اضلاع کے ساتھ ملک کی 20 ریاستوں کے تقریبا 800 کھلاڑی اور معاون حصہ لے رہے ہیں۔

کھیلو انڈیا کے اس مرحلے میں اسنو بورڈنگ، الپائن سکی، نورڈک سکی، اور سنو ماؤنٹینیرنگ کے مقابلے منعقد کیے جائیں گے۔کھلاڑیوں میں مختلف مقابلوں کو لے کر زبردست دلچسپی پائی جا رہی ہے۔ محکمہ سیاحت، گلمرگ ڈیولپمنٹ اتھارٹی اور دیگر اسٹیک ہولڈرز کے اشتراک سے محکمہ یوتھ سروسز اینڈ اسپورٹس اور جے اینڈ کے اسپورٹس کونسل کے زیر اہتمام، سرمائی کھیل اس کے اسنو لیپرڈ مسکوٹ کی نمائش کے ساتھ شروع ہوں گے اور اس میں ایک ترانہ اور ملبوسات پیش کیے جائیں گے جو کھیلو انڈیا گیمز کی پہچان ہے۔

آج کے کھیلوں میں گولف کورس میں مردوں اور خواتین کے لیے نارڈک اسکیئنگ شامل ہے۔ جموں و کشمیر کے لیفٹیننٹ گورنر منوج سنہا، کھیلو انڈیا سرمائی کھیل 2024 کے آغاز کے موقع پر افتتاحی تقریب میں شرکت کریں گے۔

واضح رہے کہ کرکٹ کے لیجنڈ سچن تندولکر نے حال ہی میں کشمیر کا دورہ کیا تھا۔انہوں نے بھی جموں و کشمیر اسپورٹس کونسل کے ساتھ اپنی نیک خواہشات کا اظہار کیا ہے۔ شرکت کرنے والے کھلاڑیوں کو مشورہ دیا ہے کہ وہ کھیل سے لطف اندوز ہوں۔کھیل کے ذریعہ کو اپنے خوابوں کو حقیقت میں بدلنے کی کوشش کریں۔

افتتاحی اور اختتامی تقریبات میں مقامی فنکاروں کی طرف سے دلکش ثقافتی پرفارمنس پیش کی جائے گی۔اس میں خطے کی بھرپور ثقافتی تاریخ کی نمائش ہوگی۔ جموں و کشمیر نے کھیلو انڈیا کے تین ایڈیشنز کا کامیابی کے ساتھ انعقاد کیا ہے۔ گلمرگ کو سرمائی کھیلوں کے مرکز میں تبدیل کیا ہے اور مقامی سیاحت، ثقافت اور کھانوں کو فروغ دیا ہے۔