ترال میں برفباری سے پیدا شدہ صورت حال پر ہنگامی میٹنگ

جموں وکشمیر کے ضلع پلوامہ کے ترال میں برف باری کی صفائی کیلئے ہنگامی میٹنگ منعقد کی گئی،اور بجلی بحال کردی گئی۔

ترال:برفباری سے پیدا شدہ صورتحال کی وجہ سے عوامی مشکلات کا جائزہ لینے کے لیے آج اے ڈی سی آفس ترال میں ایک اہم میٹنگ منعقد کی گئی جس کی صدارت ممبر اسمبلی ترال رفیق احمد نائک نے کی جب کہ میٹنگ میں تحصیل ترال اور آری پل کے دونوں تحصیلدار موجود رہے۔ اس کے علاوہ آر اینڈ بی، پی ایم جی ایس وائی بجلی صحت عامہ اور دیگر لازمی سہولیات سے وابسطہ افسران بھی میٹنگ میں موجود رہے۔

اس موقعے پر برفباری کے بعد پیدا شدہ صورتحال کو لیکر سیر حاصل گفتگو کی گئی۔ اس موقعے پر ممبر اسمبلی ترال نے افسران پر زور دیا کہ وہ عوامی خدمت کے لیے خود کو وقف کریں کیونکہ ان ایام میں عوام کو ایک بہتر حکمرانی کی ضرورت ہوتی ہے۔ اس موقعے پر افسران نے بتایا کہ ترال میں تقریبا سبھی رابطہ سڑکوں سے برف ہٹای گئی ہے جب کہ بجلی بھی تمام علاقے میں بحال کر دی گئی ہے۔

اس موقعے پر ممبر اسمبلی ترال رفیق احمد نائک نے میڈیا کو بتایا کہ بھاری برفباری کے بعد مشکلات پیدا ہونا ایک فطری عمل ہے تاہم ترال انتظامیہ نے بہت اچھا کام کیا ہے اور لوگوں کو بھی اس ماحول میں تعاون کرنا چاہیے۔ انہوں نے مزید کہا کہ جہاں بھی عوامی شکایات ہوں گی وہاں ہم عوامی شکایات کا ازالہ کرنے کی حتی الامکان کوشش کریں گے۔