اسلامک یونیورسٹی اونتی پورہ میں مادری زبان کا عالمی دن منایا گیا

عالمی یوم مادری زبان سنہ 2000 سے ہر سال دنیا بھر میں لسانی تنوع کی بقا کے لیے منایا جاتا ہے۔

ترال (شبیر بٹ):عالمی یوم مادری زبان کے موقعے پر وادی بھر میں تقریبات کا اہتمام کیا گیا۔ اسلامک یونیورسٹی آف سائنس اینڈ ٹیکنالوجی، اونتی پورہ نے ینگ ڈراماٹسٹ سوسائٹی کے تعاون سے مادری زبانوں کے عالمی دن 2025 کی مناسبت سے ایک خصوصی تقریب کا انعقاد کیا۔

یونیورسٹی کیمپس میں منعقد ہونے والی اس تقریب میں یوٹی کی کشمیری مادری زبان کی اہمیت پر روشنی ڈالی گئی۔ اس تقریب میں تھیٹر کی پرفارمنس کے علاوہ کئی سرگرمیاں شامل تھیں۔

اسکالرز، ماہرین، اور طلباء پروگرام میں موجود تھے، جس دوران لسانی تعلیم کو فروغ دینے کے طریقوں پر تبادلہ خیال کیا گیا۔ یونیورسٹی کے رجسٹرار، ڈین آف سٹوڈنٹس، چیئرمین ینگ ڈراماٹسٹ سوسائٹی، اور کچھ شعبہ جات کے سربراہان بھی بھی اس موقع پر موجود تھے۔

عالمی یوم مادری زبان کی تاریخ

مادری زبان کا دن بین الااقوامی سطح پر زبانوں کو فروغ دینے اور ثقافت کی حفاظت، لسانی تنوع کی بقا کے بارے میں بیداری پیدا کرنے کے لیے منایا جاتا ہے۔ عالمی یوم مادری زبان ہر سال دنیا بھر میں 21 فروری کو منایا جاتا ہے۔ اس دن کا آغاز سنہ 2000 میں مادری زبانوں کے تحفط کی غرض سے شروع کیا گیا۔ اس دن کو پہلی بار اقوام متحدہ کی تعلیمی، سائنسی اور ثقافتی تنظیم (UNESCO) نے متعارف کرایا تھا۔ کہا جاتا ہے کہ سب سے پہلے یوم مادری زبان بنگلہ دیش میں منایا گیا تھا۔