شوپیان: شوپیان میں ہیپاٹائٹس بی کے متعدد کیسز سامنے آنے کے بعد ضلع انتظامیہ نے فوری طور پر عوام کو ضروری احتیاطی تدابیر اپنانے کی ہدایت کی ہے۔ ڈپٹی کمشنر شوپیان، شاہد سلیم نے عوام سے اپیل کی ہے کہ وہ پانی کو اچھی طرح ابال کر استعمال کریں تاکہ بیماری کے مزید پھیلاؤ کو روکا جا سکے۔
ڈپٹی کمشنر نے عوام کو یقین دلایا کہ صورتحال مکمل طور پر قابو میں ہے اور صحت کی ٹیمیں علاقے میں مسلسل نگرانی کر رہی ہیں۔ انہوں نے مزید بتایا کہ حکام کی جانب سے پانی کی فراہمی کے نظام کا بھی معائنہ کیا جا رہا ہے تاکہ کسی قسم کی آلودگی کو روکا جا سکے۔
غور طلب ہے کہ اس دوران ڈپٹی کمشنر نے مختلف فلٹریشن پلانٹس کا دورہ کیا، جہاں سے شوپیان کے مختلف علاقوں کو پانی فراہم کیا جاتا ہے۔ عوام سے کہا گیا ہے کہ وہ بلا ضرورت گھبرانے کے بجائے احتیاطی تدابیر اپنائیں اور حکومتی ہدایات پر عمل کریں۔