سرینگر (جموں کشمیر) :سرینگر کے ڈاؤن ٹاؤن علاقے میں آگ کی ایک ہولناک واردات میں چار رہائشی مکان خاکستر ہو گئے۔ آگ کے سبب لاکھوں روپے مالیت کی گھریلو اشیاء راکھ کے ڈھیر میں تبدیل ہو گئیں۔ آتشزدگی کے سبب گرچہ کوئی جانی نقصان نہیں ہوا تاہم آگ کی اس ہولناک واردات نے کئی کنبوں کو کھلے آسمان تلے زندگی گزارنے پر مجبور کر دیا ہے۔
پائین شہر کے پتھر مسجد، اسلام یاربل علاقے میں دوران شب ایک رہائشی مکان سے اچانک آگ نمودار ہوئی جس نے آناً فاناً اپنے متصل تین مزید رہائشی ڈھانچوں کو اپنی زد میں لے لیا۔ عینی شاہدین نے بتایا کہ پرویز احمد صوفی کے رہائشی مکان سے آگ نمودار ہوئی اور آگ اس قدر بھیانک تھی کہ اس نے چند سیکنڈوں کے اندر ہی مزید تین مکانوں کو اپنی زد میں لے لیا۔