کانگریس اسکریننگ کمیٹی کی سرینگر میں میٹنگ - Congress NC Alliance

این سی اور کانگریس نے اسمبلی انتخابات میں سیٹ شیئرنگ کا صرف اعلان کیا ہے تاہم ابھی تک سیٹ شیئرنگ کی حتمی فہرست جاری نہیں کی گئی ہے۔ سیٹ شیئرنگ کے معاملے میں دونوں جماعتوں میں مکمل اتفاق نہیں ہوا ہے۔

سرینگر (جموں کشمیر) :اسمبلی انتخابات میں نیشنل کانفرنس (این سی) اور کانگریس کے درمیان اتحاد کے اعلان کے بعد پردیش کانگریس کمیٹی کی اعلیٰ قیادت اپنے امیدواروں سے متعلق سرینگر کے ایک نجی ہوٹل میں اسکریننگ کمیٹی کی میٹنگ منعقد کر رہی ہے تاکہ نیشنل کانفرنس کے ساتھ سیٹوں کی تقسیم پر ناراض پارٹی لیڈروں کے خدشات کو دور کیا جا سکے۔

جب سے کانگریس اور این سی کے درمیان اتحاد کا اعلان ہوا ہے، کانگریس پارٹی کے کئی رہنماؤں میں ناراضگی ہے۔ چند روزقبل کانگریس کے ایک سینئر رہنما اور جزب اختلاف کے لیڈر راہل گاندھی اور پارٹی کے قومی صدر ملکارجن کھرگے جموں وکشمیر کے دو روزہ دورے پر تھے۔ جس دوران پارٹی ہائی کمان خاص طور پر راہل گاندھی سے جموں و کشمیر کے چند کانگریس رہنماؤں نے شکایت کی تھی کہ ’’این سی کے ساتھ سیٹ شیئرنگ کے دوران پارٹی کے کارکنوں کے مفادات کو خاطر میں نہیں لایا جا رہا ہے اور انہیں اہمیت بھی نہیں دی جارہی ہے۔‘‘

اسی تناظر میں جموں وکشمیر پریش کانگریس کمیٹی کے نو منتخب صدر طارق حمید قرہ کی صدارت میں سینئر لیڈر جی اے میر اور دیگر رہنماؤں کے ساتھ میٹنگ جاری ہے اور آج شام یا دیر رات تک کوئی فیصلہ متوقع ہے۔

ادھر، نیشنل کانفرنس کے صدر ڈاکٹر فاروق عبداللہ کے ذریعے اتحاد کا اعلان کرنے کے بعد سے کسی بھی پارٹی نے امیدواروں کی کوئی رسمی فہرست جاری نہیں کی ہے لیکن چند رہنماؤں نے اتحاد کا مینڈیٹ حاصل کرنے کا دعویٰ کیا ہے۔ لیکن این سی اور کانگریس کے درمیان کئی نشستوں پر معاملہ پھنسا ہوا ہے، جن میں وادی چناب کی آٹھ نشستوں، کشمیر کی چند اور پیر پنجال کی کچھ نشستیں شامل ہیں۔