بیرواہ میں سرجان برکاتی کے حامیوں اور این سی کارکنان کے بیچ تصادم، صغریٰ برکاتی کو بھی لگی چوٹ، ایف آئی آر درج - Assembly Election 2024

بڈگام کے بیروہ میں نیشنل کانفرنس کے حامیوں اور سرجان برکاتی کے کارکنان کا آپس میں تصادم ہوگیا جس میں صغرا برکاتی کو معمولی چوٹ آئی ہے۔ اس دوران ان کی گاڑی کے شیشے بھی توڑ دئے گئے۔ اس ضمن میں نیشنل کانفرنس کے فردوس نبی نے کہا کہ یہ واقعہ محض ایک غلط فہمی کی وجہ سے ہوا ہے جس کو شر پسند عناصر غلط رنگ دے رہے ہیں۔

بڈگام (جموں و کشمیر): بیروہ میں شام کے اوقات میں نیشنل کانفرنس کے حامیوں اور سرجان برکاتی کے کارکنان کے مابین جھگڑا ہوا ہے۔ دراصل نیشنل کانفرنس کے کارکنان دن بھر کی انتخابی مہم ختم کر کے واپس لوٹ رہے تھے کہ ان کا سامنا سرجان برکاتی کے ورکرز کے ساتھ ہوا اور دونوں طرف شدید نعری بازی ہوئی۔

صغرا برکاتی جو کہ مولوی سرجان احمد کی بیٹی ہیں اور اپنے باپ کے لیے انتخابی مہم بھی چلا رہی ہیں۔ اسی درمیان بیروہ میں نیشنل کانفرنس کے کچھ کارکنان اور سرجان برکاتی کے حامیوں کے بیچ تنازع ہو گیا۔ اس جھگڑے میں صغرا برکاتی کو نقصان پہنچا اور ان کی گاڑی کا شیشہ توڑ دیا گیا، جس کے بعد صغرا کو سب ضلع اسپتال بیروہ لے جایا گیا جہاں پر وہ بالکل ٹھیک ہیں اور ان کو ڈسچارج بھی کردیا گیا۔ اس واقعے کو فیس بک پر لائیو کردیا گیا اور ان کے ساتھ پیش آئے حادثے کے بارے میں بتایا گیا۔

اس ضمن میں نیشنل کانفرنس کے فردوس نبی نے ای ٹی کو بتایا کہ یہ محض ایک غلط فہمی ہوئی ہے جس کو شر پسند عناصر غلط رنگ دے رہے ہیں۔ انہوں نے کہا کہ سغرا ہماری بہن ہیں اور وہ ہماری مہمان بھی ہیں اگر ان کے ساتھ کوئی بھی کسی طرح کا ناشائستہ سلوک کرتا ہے تو وہ غلط ہے۔

فردوس کا کہنا ہے ہم صغرا کو دعوت دیتے ہیں کہ وہ ہمارے ساتھ دسترخوان پر بیٹھیں اور کھانا کھائیں کیونکہ وہ ہماری بہن ہیں، لہذا اگر ان کے دل میں کوئی بھی ملال ہے تو وہ دور کریں۔

یہ بھی دیکھیں:

سجاد لون نے بھی اس ضمن میں ایکس پر ٹویٹ کر کے اس حادثے کے بارے میں افسوس کا اظہار کیا اور ساتھ میں نیشنل کانفرنس کے ورکرز کو تنقید کا نشانہ بنایا۔

اس ضمن میں فردوس نے کہا کہ سجاد غنی لون کو پہلے اپنے گھر میں جھانک کر دیکھنا چاہیے اور پارلیمانی انتخابات میں جن لوگوں نے انہیں جواب دیا ہے اس پر میں بات کرنا مناسب بھی نہیں سمجھتا ہوں۔